Vawiin khan Lawngtlai District Consultative Committee, District Level Review Committee leh District Level Security Committee chu an Chairman Lawngtlai Bawrhsap Pi Shashanka Ala, IAS hovin DC Conference Hall-ah an thu khawm a. Lead Bank office, RBI representative, NABARD representative, bank hrang hrang leh line department ai awhte an tel.

He hunah hian nikum 2018 October atanga December thla (3rd Quarter) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - Stand-Up India, PMAY (Housing for All) leh Women Self Help Group lama bank hma lak dan te sawi ho a ni bawk.

He thut khawmah hian CD ratio leh non priority loan chungchangah Lawngtlai District-a bank-te chuan an ti tha thawkhat a, agriculture kaihhnawih loan pek chhuah lamah erawh tan lak an ngaih thu sawi lan a ni.

Chairman, Pi Shashanka Ala chuan mi rethei, kut hna thawktu leh zirlaite tana loan lak theih hrang hrangte mipuiin an hriata an chhawr tangkai theih nana zau taka puanzar chu line department-te'n an mawha la tura hrilhin, sawrkar scheme hnuaia loan la, ti tha duh si lo awm thin chu tihziaawm a nih theih nan line department-te'n an vil zui that a pawimawh thu a sawi a. Ti tha lo leh loan rul tha duh lo an tam avang ngawtin bank-te pawh inthlahdah a, loan pek chhuah tim chuang lo tura chahin, khawtlang hma sawn nana sum puktir (loan pek) chu an mawhphurhna a ni tih hre chiang turin a chah.