No.3703/2021-2022

Pawlkut thla ni 17, 2022: Vawiin khan Lawngtlai District Level Committee on Fire Prevention (DLCFP) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. Kangmei ven kawnga hma lak dan tur hrang hrang an sawi ho.

Chairman Dr Andrew H. Vanlaldika chuan nikum lamah Mizoram hmun hrang hrangah kangmei vanga harsatna nasa tak thlengin, ram mipuite pawhin kan buai phah hle tih sawiin, kha kha kangmei ven pawimawhzia leh nasa zawka tan lak a tulzia tilangtu nia a hriat thu a sawi a. Kangmei a chhuah tawh hnua thelh mih tum chu tha leh zung, sum leh pai sen a hautak em avangin a chhuah hmaa lo inven lawkna lam chu ngaih pawimawh lehzual a tul a ni, a ti.

Member Secretary, Lai Autonomous District Council (LADC)-a District Council Conservator of Forests (DCCF) Pu K. Lalromawia hnen atangin kum hmasa lama hma lak dan report ngaihthlak a ni a. Kumin atana hma lak dan tur hrang hrang sawi ho zui nghal a ni.

Kumina hma lakna tur hrang hrang zingah, February ni 7 - 12, 2022 chhunga hman tur Fire Prevention Week 2022 hawnna chu February ni 7-ah DC Conference Hall-ah buatsaih ni se, tih a ni a. Lawngtlai District chhunga kangmei venna lam inzirtirna (awareness campaign) uar zawka buatsaih leh tura ruahman niin, hemi atan hian khaw hrang hranga zirtirna pea chhuah bakah, video clip siam leh thuziak (hoarding board) tar te kalpui tum a ni.

Kangmei ven kawnga thawk tha khuate chawimawina 'Village Level Fire Prevention Award 2022' chu kumin pawh hian siam leh tum a ni a. State Level Committee-in lo hal theih hun chhung a bituk March ni 15 chu zawm ve tur leh leipui/huan hal hun hran bithliah tura District Council thuneitute ngen leh sapela ram vah leh ram hal khapna tichhuak tura District Magistrate ngen te rel a ni a. Ram kang tur ven nana mei dai phiah te, kangmei ven chungchanga mipui zirtirna a tam thei ang bera puangzar tura YLA leh kohhran lam ngen te pawh rel a ni bawk.