No.199/2020-2021

Vawiin khan Lawngtlai District Level Task Force on COVID-19 leh District Disaster Management Authority chu an Chairman Pi Shashanka Ala, IAS hovin DC Conference Hall-ah an thu khawm a. COVID-19 vanga inkharkhip kalpui mek dan leh hma lak zel dan tur an sawi ho.

Incident commander-te atangin buhfai chungchangah harsatna lian tham a awm rih lo niin thu dawn a ni a. Ration card nei lote'n buhfai an dawn ve theih nan veng tina ration card nei lote chhinchhiah fel a ni tawh a, inkharkhip hun chawlhkar khat la awm chhunga buhfai an mamawh tur zat pek tuma ruahmanna siam a ni.

State pawn atanga bungraw mamawh lo lut te felfai tak leh awmze neia kalpui a nih theih nan uluk taka vil chhunzawm ni se, tih a ni a. District chhunga mipuite mamawh thlai thar leh sangha lak khawm a, hralh chhuah pawh Horticulture leh Fisheries hnuaiah tluang taka kalpui zel niin, harsatna awm lo tura ngaih a ni.

District chhunga lirthei leh mihring veivah chungchangah Deputy Commissioner office atanga phalna (permit/pass) chauh rin tur a nih thu tar lan niin, District dang DC emaw, state sawrkar hnuaia phalna pek department administration emaw atanga phalna nei sate erawh chu harsatna awm lova tlangtir zel tur a nih thu sawi lan a ni.

MGNREGA hnuaia ni za inhlawhna January, February leh March thla atana hlawh la thun bak chu job card holder-te account-ah thun mek zel a nih thu DRDA lam atangin ngaihthlak a ni a. Kum 2019-2020 chhung hian ni 100 inhlawh tlin a nih thu tar lan a ni bawk. Hlawh lut hi mipuite'n an mamawh hun taka an hman theih nan BDO te kaihhruaina hnuaiah VC te nen bank atanga lak chhuah dan tur ruahman a ni a, inkharkhip chhung hian ruahmanna fel tak hnuaiah a indawtin lak chhuah mek zel a ni.

Lawngtlai District-a home quarantine mi 580 zinga mi 441 chuan an quarantine hun hmang zo tawhin, DLTF atangin certificate felfai tak nen chhuahtir an ni tawh a, tuna home quarantine-a la awm mek hi mi 139 an ni. Facility quarantine-a awm mi 24 atangin mi 19 chuan an quarantine hun hmang zovin, an chhuak tawh a, facility quarantine lai hi mi 5 an la awm a ni.