2859/2022-2023

Sahmulphah thla ni 29, 2022: Lawngtlai District Sports Committee (LDSC) chu vawiin khan an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm.

Chairman, Lawngtlai Bawrhsap Pu Amol Srivastava chuan DSC chu District chhunga sports discipline hrang hrang chawi kan leh tihhmasawnna tur ngaihtuahtu tur a nih angin sports association hrang hrang ai awh kal khawmte chu mahni discipline chauh ngaihtuah lo va, District-in sport lama hma a sawn theihna tura ngaihtuahna zau zawk seng ṭhin turin a chah a. Sport lamah District-in rualkhai taka hma a sawn theih nan discipline hrang hrangte inngaih pawimawhsak tawn leh thawh hona ṭha chhawm nun zel a pawimawh a ni, a ti. 

He hunah hian Mizoram State Sports Council aṭanga sport tihhmasawnna tur, promotional fund 2022-23 lo kal hman dan tur ngaihtuah a ni a. Promotional fund chu sport tihhmasawn nan a daihzai leh ṭangkai thei ang bera hman tum a ni a. DSC hnuaia sport association te'n state level leh national level-a ai awh an tirh dawn emaw, tournament lian tham an buatsaih dawn emawin DSC aṭanga ṭanpuina an mamawh chuan felfai taka ziakin dilna theh lut se, chumi chu Committee-in ngaihtuah ṭhin ni se, tih a ni a. Thla tin DSC ṭhut khawm buatsaih tum niin, ṭhut khawmah hian sport association hrang hrangte'n thla khat chhunga an hma lakna leh hmachhawp an neihte report pein, hma lak dan tur ngaihtuah ṭhin tum a ni.



Attachment

  • Loading attachment...