No.110/2020-2021

COVID-19 vanga inkharkhip chhunga mipuite'n an mamawh ang ei tur tha an hmuh theih nana Lawngtlai District Supply Chain hma lakna peng khat atan vawiin khan Fisheries Department chuan Lawngtlaiah an farmer-te sangha thar an hralh chhuak.

Vawiina an sangha hralh chhuah hi Bungtlang 'S'-a sangha dil siamtute thar chhuah niin, nizan lam khan Lawngtlaiah phurh thlen a ni a. Tun hi Lawngtlai district supply chain hnuaia sangha hralh thawh khatna niin, a vaiin quintal 0.70 lak phawt a ni a. LADC-in a man a bithliah angin, kg 1 hi Rs. 400-a hralh a ni a. Veivah vel a harsat deuh avangin Electric Veng leh veng hnai zualah te pek phawt a ni.

Lawngtlai District-a Fisheries hnuaia dil siamtute sangha thar chhuah hi lak tur a la awm nual a, kar leh lamah a aia tam zawk lak tum niin, hei hi veng hrang hrangah a tah tawla sem zel tur a nih thu Lawngtlai DFDO Pi Lalremsangpuii chuan a sawi.

District supply chain hnuaiah hian inkharkhip chhung pawha Lawngtlai District mipuite'n ni tin khawsak nana an mamawh thil hrang hrang bakah, chaw tha mamawh ang an hmuh theih nan hma lak a ni a. Kut hna thawktute thei, thlai, sa leh sangha thar chhuahte chu a kaihhnawih department te'n mipuite tan an phurh khawmsak thin a, hei hi veng hrang hranga task force-te kal tlangin hralh chhuah thin a ni.