No.3295/2020-2020

Lawngtlai, Vawkhniahzawn thla ni 21, 2020: Vawiin khan Lawngtlai District TB (Tuberculosis) Forum {DTF} chu an Chairman, Bawrhsap Dr Andrew H. Vanlaldika, MCS hovin Lawngtlai DC Conference Hall-ah an thu khawm.

Chairman Dr Andrew H. Vanlaldika chuan hmanlai chuan TB chu natna tihdam theih loh, thihpui ngei ngei tura ngaih a ni thin a, tunah erawh TB chu a hun taka a dan dik taka enkawl chuan thihpui loh tura ngaih a ni tawh tih sawiin, Lawngtlai District-ah TB vanga thi an awm loh nan a thawktute bakah, tlawmngai pawl leh mipuite tan rual a pawimawh hle tih a sawi a. Zau zawka TB chungchang inzirtir a, khawtlanga TB veite thinhrikna awm thin te pawh tibo tura hma lak a tul hle a ni, a ti.

District TB Officer Dr S. Thaizi chuan District TB Forum din chhan sawi fiahin, TB kaihhnawih thil hrang hranga hma laknaah medical lama thawktute chauh ni lovin, sawrkar department dang, tlawmngai pawl, VC leh mimal thahnem ngaite nen tang ruala hma lak ho nan a nih thu a sawi a. Sr Treatment Supervisor Pu James Zarzoliana'n National TB Elimination Programme (NTEP) hnuaia hma laknaa Lawngtlai District dinhmun tlangpui tar langin, a sawi fiah a. NTEP a hlawhtlin theihna tur leh TB um bona kawnga Lawngtlai District chhunga hma lakna tur hrang hrangte sawi ho nghal a ni.

India ramah kum 1962 atang khan National TB Control Programme (NTCP) hnuaiah TB khuahkhirh tura hma lakna kalpui niin, kum 2003 atangin Revised National TB Control Programme (RNTCP) hnuaiah ngawrh zawka hma lak a ni a. National TB Elimination Programme (NTEP) hnuaiah kum 2025-ah chuan India ram atanga TB um bo a nih theih nan beihpui thlak mek a ni.

Lawngtlai District-ah TB vei hmuh chhuah kum 2015-ah mi 98, kum 2016-ah mi 95, kum 2017-ah mi 102, kum 2018-ah mi 133, kum 2019-ah mi 121 leh kum 2020 June thla thlengin mi 50 an awm a. Kum 2015-ah enkawl dam mi 118 leh thihpui mi 4, kum 2016-ah enkawl dam mi 101 leh thihpui mi 3, kum 2017-ah enkawl dam mi 99 leh thihpui mi 5, kum 2018-ah enkawl dam mi 92 leh thihpui mi 1, kum 2019-ah enkawl dam mi 141 leh thihpui mi 1, kum 2020 June thla thlengin enkawl dam mi 63 leh thihpui mi 3 an awm a ni.

TB damdawi ei that loh vang leh chhan dang vanga damdawiin hna a thawh that theih lohna Drug Resistant TB (DR-TB) damlo Lawngtlai District-a mi 8 hmuh chhuah tawhah mi 4 chu enkawl dam tawh niin, mi 1-in a thihpui a, enkawl mek mi 3 an awm. DR-TB damlo enkawl hi a khirh deuh avangin a bul tanna tih tur hrang hrang hi Aizawl lamah tih a ni thin a, enkawl mek mi 3 zinga 1 hi a vawi khat nan Lawngtlaiah enkawlna bul tan a ni thung a. Tunah District Hospital Lawngtlai Isolation Ward-ah enkawl mek a ni.

District TB official-te chuan TB hrik en leh damlo enkawlna chu sawrkarah a thlawn vek a nih bakah, damdawi ei chhung (thla ruk chhung) zawng thla tin Rs 500/- pek an nih thu leh inenkawl zawh hnuah Rs 750/- pek thin an nih thu sawiin, TB chu enkawl hma a, tha taka damdawi ei chuan a dam hma a, harsatna nasa zawk a pumpelh theih tih an sawi.

TB hi chuap TB (pulmonary) leh chuap pawn lam TB (extra pulmonary) tiin hlawm 2-a thliar a ni a. Chuap TB, an khaka hrik hmuhte chauhvin mi dang kai chhawng theia ngaih niin, he'ngte pawh hian ni 10-14 chhung damdawi an ei hnu chuan mi dang kai chhawng thei tawh lo tura ngaih a ni a. TB veite thinhrikna awm thin chu hriat chian tawk loh vang a ni tih thu he meeting-ah hian tar lan a ni.