No.2183/2021-2022
Aizawl Mimkut thla ni 10, 2021: Vawiin khan Lawngtlai District Water & Sanitation Committee (DWSC) chu an Chairman, Lawngtlai Bawrhsap Dr Andrew H. Vanlaldika hovin a office chamber-ah an thu khawm a. Azadi Ka Amrit Mahotsav (AKAM) kalpui chhunga hma lakna tur hrang hrang an sawi ho.

Chairman Dr Andrew H. Vanlaldika chuan Lawngtlai District chhunga faina leh thianghlimna kawnga hma lakna kal mek chu chak lehzuala kalpui a tul thu a sawi a. Faina chu mi tin mawh a nih rualin, sawrkar office hotu lute leh khawtlanga mi challang tak takte chu mite entawn tura hmahruaitu an nih a pawimawh thu a sawi.

DWSC Member Secretary, PHED Lawngtlai WATSAN Division-a Sr Executive Engineer Er Netralal Jaisi chuan Azadi ka Amrit Mahotsav awmzia leh nihphung tlangpui a sawi fiah a. India ramin zalenna a hmuh (Independence) atanga a kum 75-na lawm nan 'Azadi Ka Amrit Mahotsav' chu ruahman a nih thu leh hemiah hian faina kawnga beihpui thlak dan tur hrang hrang duan a nih thu a sawi a. Swachh Bharat Mission (Gramin) hnuaia PHED hma laknaah Lawngtlai District-a thingtlang khaw tin chu pawnlera inthiar awm tawh lohna (open defecation free - ODF) an nih tawh thu leh hemi atang hian hnungtawlh lo va, ODF Plus ni tura hma lakna kalpui chhunzawm zel a nih thu a tar lang bawk.

Vawiin thut khawmah hian Azadi Ka Amrit Mahotsav huam chhunga Swachhata Hi Seva (SHS) hnuaia September ni 15 leh October ni 2, 2021 inkar chhunga hma lakna kalpui dan tur sawi ho a ni a. September ni 17, 2021-ah Areopagy-ah faina inzirtirna hun buatsaih a, faina hnatlang (swachhata shramdhaan) kalpui chhunzawm rel a ni a. September ni 20, 2021-ah District chhunga khaw tinah plastic hman nawn theih loh chi (single use plastic) hman loh hram tum tur leh ODF Plus ni tura intiamna hun hman ni se, tih a ni a. October ni 2, 2021-ah Swachh Bharat Diwas chu District leh Block hmunpui bakah, Cheural, Lunghauka leh Hmunlaiah te hman ni se, tih a ni bawk a. ODF Plus ni tura hma lakna kawngah wall painting leh slogan writing competition buatsaih leh hmachhawp hrang hrangte sawi ho a ni bawk.

He thut khawmah hian Member Secretary chuan Swachh Bharat Mission (Gramin) leh Jal Jeevan Mission (JJM) hnuaia hna thawh kal mek report a pe nghal a. SBM(G) hnuaiah kum 2021-22 chhungin Lawngtlai WATSAN Division hnuaia chhungkaw 915 tan inthiarna (individual household latrine) saksakna tur dawn a nih tawh thu leh hma lak chhoh mek a nih thu a sawi a. JJM hnuaia kum 2024 hma ngeia thingtlang in tina tui connection (Functional Household Tap Connection) pek kim turah Lawngtlai District chhungah kum 2019-20 chhungin khaw 37-a in (household) 5,089 leh kum 2020-21 chhungin khaw 18-a in (household) 3,204 chu FHTC pek an nih thu sawiin, kum 2021-2024 atan project 126 (FHTC 16,333) ruahmanna siam a, theh luh tawh a nih thu a tar lang bawk.