No.2182/2021-2022

Aizawl the 10th September 2021: Lunglei Road Protection Squad (Lunglei North) te chuan an leader Pi. C. Lalduhzuali, SDO (S) hovin September ni 6, 2021 (Thawhtanni) atang khan inspection nei tanin tun khar chhung Lunglei hmarlam inspection an nei chhunzawm zel a ni. Pukpui, Zotlang, Serkawn ah te inspection neih tawh niin vawiinah Zohnuai ah inspection neih a ni a. A remchan angin inspection hi neih chhunzawm zel tur a ni

Inspection-ah hian kawngpui nek chep zawnga insakna bungrua leh bungraw hrang hrang dahte bakah leh lirthei chhia dah te endikna neih a ni. Vantlang tana hnawk leh kawngpui dal zawnga insakna bungrua dah te hnenah hun bituk pek chhunga senghawi tura hriattirna pek an ni. In sa lai mek te in sakna bungrua dah phalna sorkar atanga la lote chu Urban Development & Poverty Alleviation Department (UD&PA) Lunglei hnenah phalna la tura hriattir an ni. Kawngpui/ kawngsir a motor chhia dah thin te chu hmundanga dah sawn tura hriattir an ni a. Chhun lamah kawng dung a lo thawl zawk nan motor park na nei si kawngpui dung/sir a motor park thin te pawhin an garageah park tura hriattir an ni a, hmun chep laia motor park thin te pawhin hmun remchang zawk dap tura tih an ni bawk. Footpath a mipui kalna dal zawnga Autorickshow leh insakna bungrua dah thin te pawh dahna dang ngaihtuah tura tih an ni. Road Protection Squad te hi khawtlang hruaitu VC ten tawiawmin tuihawk luankawr leh kawngpui dinhmun te an enfiah ho thin a ni.