Vawiin khan Nehru Yuva Kendra (NYK), Lawngtlai hnuaia Youth Development Association (YDA) huaihawtin Central YLA Hall, Lawngtlai-III-ah Lawngtlai District Youth Convention 2017 hman a ni.
He huna Khuallian LADC-a LAD changtu Executive Member Pu H.Chhuanawma chuan NYK chu ram hmasawn nana thawk tura thalaite kaihruaitu a nih thu sawiin, District Youth Convention buatsaih a ni chu lawmawm a tih thu a sawi a. Mahni hna thawh apiang rinawm taka tih chu hlawhtlinna kawng pawimawh ber a nih thu sawiin, ram hmasawn nana thil pawimawh tak tak zingah ram ngaw leh nungcha humhalh chu thalaite’n intihhmuh a tul a ni, a ti.
He hun hi NYK-a Multi Tasking Staff Nl. K.Lalhmachhuani’n a kaihruai a. BCM Lawngtlai N bialtu pastor Rev. F.Lalnunmuana’n hunserh hmangin, NYK District Youth Coordinator Pi Mercy Sellate chuan inlawmna thu a sawi a. Khual zahawm Lawngtlai DIPRO Pu C.Lalhruaitluanga chuan hlawhtling tura thil pawimawh nia a hriatte sawiin, zirlaite hma lam hun atana fuihna thu a sawi a. Special guest – Lawngtlai DHO Pu L.Lalhmingmawia Pachuau, RMSA Dy DPC Pu C.Lalrinchhana leh World Vision India (CADP)-a Programme Coordinator Pu Lalramliana Ngente te pawhin thu an sawi a. Youth club member kal khawmte nen sawi hona hun hman niin, NYV Pu K.Vanhmingliana’n lawm thu sawiin hun khar a ni.
District Youth Convention hi thalaite’n an vei zawng an sawi chhuah theih nan leh an hma lam huna inbuatsaihna an neih theih nan te, ram leh khawtlang hmasawn nana ke an pen thiam theih nana inzirtirna hun atan te buatsaih a ni a. Hemi kal tlang hian an mawhphurhna leh tih turte an hriat chian leh zual phah thei dawn a ni. Vawiina hun hmanah hian Lawngtlaia youth club hrang hrang bakah, Govt Region HSS leh Southern Public High School zirlaite an kal khawm a. Youth club zingah Bazar Veng Branch YLA chu kal tha ber lawmman hlan an ni.
