Electors Verification Programme (EVP) chungchangah nimin leh vawiin khan Lawngtlaiah Additional District Election Officer (Addl DEO) Pu B. Lalchhawntluanga, MCS hovin political party ai awhte, Electoral Registration Officer (ERO) leh Asst Electoral Registration Officer (AERO) te leh Common Service Centre (CSC) te chu training pek an ni.

Training-ah hian Lawngtlai Election Officer Pu Lalremruata Sailo, MCS chuan Electors Verification Programme (EVP) chungchang a sawi fiah a. Lawngtlai District chhunga hlawhtling taka EVP kalpui theih dan tur te sawi ho nghal a ni a. Electoral roll dik, felfai leh rin tlak tak a awm theih nana hma lak dan tur pawh sawi ho a ni bawk.

EVP hi September ni 1, 2019 atanga kalpui tur niin, September thla chhung a awh dawn a. Hemi hun chhung hian vote neite'n NVSP Portal atang te, voter helpline atang te leh Common Service Centre leh Booth Level Officer (BLO) te kal tlangin an hming, kum, address leh an chanchin kimchang dang electoral roll-a a lan dan an enfiah thei ang a. Tin, BLO-te'n an huam chhunga voter-te endikin, vote nei rual electoral roll-a la chuang lote zawn chhuah hna an thawk bawk ang a. Chumia siam rem ngai leh belh ngai leh paih ngai apiang chu tih nghal zel tur a ni dawn a. Hemi hun chhung hian inthlan huna harsatna a awm loh nana polling station then emaw, section-a then emaw chungchangah pawh hma lak a ni bawk ang.

EVP hi electoral roll dik tawk lo siam that leh vote nei rual roll-a chuang si lo ziah luh a nih theih nan te, chhungkaw khata mite'n hmun khata vote an thlak theih nana an vote neihna hmun siam rem nan te, voter ID card-a thlalak fiahfai tha tak a awm theih nan leh electoral roll felfai zawk a awm theih nana ruahman a ni.