Tukin khan Lawngtlai Bazar Venga Areopagy-ah Faina Hapta 2017 chu Lawngtlai District tan Bawrhsap Dr Arun T., IAS chuan a hawng.

DC chuan faina pawimawhzia sawiin, faina kawnga hma lak chu mi tin mawhphurhna a ni, a ti a. Mahni in leh a vel bakah khawtlang vawn fai te, bawlhhlawh thliar hran leh a paihna hmun chauhva bawlhhlawh paih chu awlsam tea fai theihna kawng a ni tiin, chu chu mi tinin kan tih chuan a hranpaa faina beihpui thlak chiam pawh a ngai chuang lo, a ti. District hrisel ni turin fai hmasak a tul tih sawiin, faina avangin natna zaa 80 vel zet chu a pumpelh theih a ni, a ti a. Lawngtlai DIstrict chu district fai leh hrisel, zun leh ek thlahdah awm lohna (ODF) ni tura beihna kawngah Faina Hapta 2017 chu chak zawka ke pen tanna ni ni se a duh thu sawiin, District mipuite chu kum tluana tha thlah lova tan la turin a sawm nghal a ni. 

He hun hi Lawngtlai District Education Officer Pu Lalzuiliana'n a kaihruai a. Zaithiam zai ngaihthlak a ni bawk. He hunah hian Lawngtlaia state sawrkar leh LADC hnuaia officer leh staff te, tlawmngai pawl leh sikul naupangte an tel a. Hawnna hun hman zawh hian kal khawmte chu hmun 4-ah inthenin, Lawngtlai khawpui chhung kawng dunga bawlhhlawh te an chhar fai nghal a. Bawlhhlawh chhar fainaah hian DC leh officer-te pawh a tawp thlengin an tel ve a ni.

Faina Hapta hian October ni 9 thleng a awh dawn a. Hemi chhung hian office, zirna in leh veng leh hotel/restaurant/thingpui dawr fai te a hrang È›heuhva thlan chhuah a, lawmman pek an ni dawn a. October ni 9-ah a kharna hun hman leh tur a ni.