Nimin khan Lawngtlaia KVK Training Hall, Chawnhu-ah Indian Council of Agricultural Research (ICAR) Research Centre, Kolasib leh District Agriculture Officer (DAO) Lawngtlai leh Krishi Vigyan Kendra (KVK) Lawngtlai te tang ho huaihawtin thlai ei chhetu pangang chi khat, fall armyworm beih dan leh tihrem dan tur chungchangah field staff leh Lawngtlai District chhunga vaimim chingtu thlan bikte hnenah training pek a ni.
He training hi KVK Lawngtlaia Senior Scientist & Head Dr C. Lalfakawma'n kaihruaiin, tunlaia vaimim chingtute'n an buaipui ber fall armyworm pangang chanchin tlangpui leh a tihrem dan training neih a tulzia te a sawi a. He huna khuallian, Lawngtlai DAO Pu J. Rokima chuan lo neitute chu sum chang thlai ching uar tur leh an thlai chinte tam tham leh hlawkpui thama bei turin a fuih a. Lawngtlai District-ah hian fall armyworm hi khaw 40 velah hmuh a nih thu leh hectare 417.40-a zau a beih hman thu sawiin, sawrkar leh lo neitute tan rualna avang leh tha taka damdawi te kah a nih avangin a beih hmun zau zawng hi hectare 307.49-ah a tla hniam leh tawh tih a sawi a. Lo neitute chu, fall armworm chungchangah chauh lo pawh harsatna an neih chuan DAO office leh KVK office lamah te kal a, mi thiamte rawn hreh lo turin a chah a ni.
ICAR Kolasib lam atang hian Scientist (Agriculture Physics) Dr Saurav Saha, Scientist (Pathology) Pu Sunil Sunani leh Technical Officer (GKMS) Pu Samik Chaudhry te'n training hi pein, damdawi hmang leh rannung tangkai (beneficial insect) thlai hmuna lo awm sate leh rannung chhuah (trichogramma) hmang tea fall armyworm beih dan an zirtir a. Vaimim hmunah practical demonstration neihpui nghal niin, training hi lo neitu kal khawmte'n an hlawkpui hle tih an sawi.
