Mizoram Journalists' Association, Mamit District atanga thlanchhuah mi 7-te hnenah  Accreditation Card hlanna DIPRO, Office Chamber-ah vawiin khan Pu Paul Rokima, DIPRO, Mamit-in a nei.

Pu Paul Rokima chuan MJA-te tan Accreditation Card chu thil hlu tak niin thudik tak hailang tur leh dikna tan tlata Journalist hna thawk tur kan ni tih tarlangtu a ni a ti. Mizoram Sawrkar chuan Mizoram Chanchinbu mite a ngaipawimawhin an chanvo a dah pawimawh sak hle a, chhiat that an tawhin kutbenga an awm lohna tur ngaihtuahsak an nih thu a sawi. Mamit District chhunga MJA-te chu ram leh  mipui tana rawngbawl an nihna inhre chunga tuina thar nena an nitin hna thawk tura chahin Information Department-te nen an thawhhona kawngah inlungrualna tha tak an neih chu chhawm nung zeltu nih tum theuh turin a chah bawk a ni.

Pu C. Lalramdinzela, President, MJA Mamit District chuan Mizoram Sawrkarin Journalist-te hmakhua ngaia a hriatrengnaah lawmthu a sawi a, tuna Accreditation card kan dawn chhan hi enge tih ngaihtuah chunga  thahnemngai lehzuala hna thawk tur kan ni tih inhriat thar nan kan hman a duh thu a sawi.

Mamit District chhunga Mizoram Journalists' Association atanga Accreditation hlan mi 7-te hi:
1. C. Lalramdinzela, Editor Mamit Times
2. H. Lalramliana, Chief Editor Mamit Times
3. P. Lalchunglura, DDK
4. Lalramhnehzauvi, Editor Kumtluang
5. Lalhuma, DDK
6. Lalremruata, Editor, Kawrthah Post
7. R.D Darthanzauva, AIR- te hnenah Accreditation card hi hlan an ni.