142/2024-2025
2024 Ṭau thla ni 10: Lok Sabha Inthlanpui, 2024 lo awm tura Election Commission of India (ECI)-in Mizoram Parliamentary Constituency-a inthlan vil tura a ruat, General Observer Dr Nipun Vinayak, IAS chuan vawiin khan Lawngtlai a tlawh a. General Observer ho hian nodal officer-te, sector magistrate-te, Assistant Expenditure Observer-te, FST leh SST magistrate-te, Accounting Team, VST leh VVT leader-te leh MCMC member-te nen Lawngtlai DC Conference Hall-ah ṭhut khawm buatsaih niin, Lawngtlai District chhunga inbuatsaihna hrang hrang dinhmun leh inthlang tura inpeih fel dante thlir ho a ni.
General Observer Dr Nipun Vinayak chuan Lok Sabha Inthlanpui hmachhawn tura Lawngtlai District inpuahchahna chu ṭha leh lawmawm a tih thu sawiin, inthlanpui chu mawhphurhna nei zawng zawngte thawh hona aṭang chauhva hlawhtling thei a nih angin kal khawmte chu an hma zawna an mawhphurhna ṭheuh ṭha taka hlen chhuah tum turin a chah a. India chu inthlang ram a nih angin inthlan vawi tam tak buatsaih ni tawh mah se, inthlan chu a thar zela buatsaih a nih avangin a bul aṭangin uluk taka eng kim kalpui zel a ṭul tih sawiin, inthlan buaipuitute chu fimkhur taka eng kim kalpui tur te, team hrang hrang karah thawh hona ṭha nei tur te'n a chah a. Mizoram chu state ralmuang tak a nih avangin inthlan felfai leh muanawm tak a awm leh ang tih beisei chungin, a chhe ber lo thleng thei lakah pawh inralring tho turin a chah a ni.
He hunah hian Lawngtlai District Election Officer, Lok Sabha Inthlanpui atana Assistant Returning Officer ni bawk Pu Cheemala Siva Gopal Reddy chuan Lok Sabha Inthlanpui hmachhawn tura Lawngtlai District inpuahchahna hrang hrang powerpoint presentation hmangin a tar lang a. Lawngtlai SP Pu Lokeshwaran R. chuan venhimna lama hmalakna a tar lang bawk a. Inthlan felfai, thianghlim leh muanawm tak a awm theih nana thil pawimawh hrang hrang te sawi ho a ni bawk.
He hunah hian Lawngtlai District Election Office-in SVEEP hma lakna hnuaia mipuite vote thlak tura inzirtirna hlapui (SVEEP theme song) music video an buatsaih chu General Observer Dr Nipun Vinayak chuan a tlangzarh nghal a ni.
Ṭhut khawm zawh hian General Observer chuan Government Lawngtlai College hmuna EVM leh VVPAT dahna strong room chu tlawhin, a hmunah a enfiah nghal bawk a ni.
Lok Sabha Inthlanpui hmachhawn turin Lawngtlai District chu a inbuatsaih chho zel a. Lawngtlai District-ah hian assembly bial pathum (36-Tuichawng, 37-Lawngtlai West leh 38-Lawngtlai East) awmin, a pum puiah voter 92,455 (mipa 46,150 leh hmeichhia 46,305) an awm a. Polling station 181 awm zinga 116 chu District hmunpui aṭanga hla zual, polling party-te'n inthlan hma ni 2-a an pan ngai (P-2) niin, polling station 65 chu inthlan hma nia pan theih (P-1) a ni a. Hmeichhe hlangin inthlan an buaipuina tur polling station 20 leh ṭhalai hlang duty-na tur polling station 3 awmin, model polling station 3 leh unique polling station 2 ruahman a ni bawk.
Venhimna chungchangah Lawngtlai District-a police station 5 leh outpost 2 awm sa bakah, Naka 7 leh Quick Response Team 7 din a ni a. Inthlan chungchanga mipuite'n an mamawh anga an biak pawh theih turin District Control Centre din niin, toll free 1950-ah hian eng tik lai pawha biak pawh theih a ni a. Lawngtlai District hi sector 27-ah ṭhen niin, sector magistrate-te'n an vil reng a. MCC kenkawh kawngah Flying Squad leh Static Surveillance Team te'n hna thawk rengin, candidate-te sum senso vil turin Assistant Expenditure Observer, Accounting Team leh Video Surveillance Team leh Video Viewing Team te an awm bawk a. District MCMC chuan print, electronic leh social media an vil reng bawk a ni.
Attachment
- Loading attachment...
