143/2024-2025 

2024 Ṭau thla ni 10: Lok Sabha Inthlanpui, 2024-a Lawngtlai District chhunga assembly bial pathuma inthlan nana Electronic Voting Machine (EVM) leh Voter Verifiable Paper Audit Trail (VVPAT) hman turte chu vawiin aṭang khan Government Lawngtlai College-ah inthlanna hman theih mai tura buatsaih fel (commission) ṭan a ni.

He hunah hian polling station tina EVM (control unit + ballot unit) leh VVPAT hman turte chu a siamtu Electronics Corporation of India Limited (ECIL) aṭanga engineer paruk lo kalte'n hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.

EVM commission-naah hian General Observer, Assistant Returning Officer leh election official dangte bakah, political party ai awhte pawh an tel a. EVM buatsaih fel sate hi a dik ngei a ni tih finfiah nan vote thlak chhin zel a ni.

Lok Sabha Inthlanpui, 2024 atan hian Lawngtlai District chhunga polling station 181-ah EVM leh VVPAT kawp 181 mamawh a ni a. ECI-in inkaihhruaina a siam angin, thlaveng reserve-a dah tur CU 45%, BU 45% leh VVPAT 55% mamawh a ni bawk a. Hemi daih tur hian CU 261, BU 261 leh VVPAT 279 chu commission tura ruahman a ni a. Commissioning hi April ni 12, 2024 (Zirtawpni)-ah zawh fel hman beisei a ni.

Attachment

  • Loading attachment...