Vawiin khan Lawngtlaiah Green Mizoram Day hman a ni a. Chawhma dar 11-ah DC Conference Hall-ah a hawnna inkhawm buatsaih niin, Lawngtlai SP Pu Amit Goel IPS chu Khuallian a ni.

Pu Amit Goel chuan Green Mizoram Day hman thin chu sik leh sa danglam zel leh kan chhehvel boruak chhe zel tur venna kawng tha tak nia a hriat thu sawiin, uar zawka chhunzawm zel tlak a ni, a ti a. Kumin Green Mizoram Day thupui, "Thing phun belh la, a awm sa humhalh rawh," tih chu kan tu leh fa leh thlah lo la awm zel turte tana chenna tlak khawvel nuam zawk kan hnutchhiah theih nana kawng zawh tur thlanawm ber nia a hriat thu a sawi.

Hawnna inkhawm hi Deputy Conservator of Forests (Wildlife) Pu PC Lalchhandama'n a kaihruai a. Lawngtlaia Green Mizoram Day hman tawh dan sawiin, kangmei ven kawnga thawk tha khua chawimawina 'Village Level Fire Prevention Award 2018' dawngtu khua a puang nghal a. Sub-Deputy Commissioner Pu Vabeimozachhi Chozah MCS chuan lawm thu sawiin hun khar a ni. 

Village Level Fire Prevention Award 2018 lawmman pakhatna hi Mampui khuain an dawng a; pahnihna chu Lungpher 'S' niin, Lawngtlai Council Veng chu pathumna an ni.

Hawnna inkhawm neih zawh hian thing tiak phun tur semin, sawrkar department leh tlawmngai pawl hrang hrangte'n Mampui kawnga an thing phunna hmun tur lam an pan nghal a. Vawiin hian thing tiak 370 vel phun a ni.

Green Mizoram Day hi a tirah chuan Green Aizawl tiin kum 1998 khan Aizawlah hman tan a ni a. Kum 1999 atangin Green Mizoram tih hming chawiin ram pumah hman a ni. Lawngtlai District bikah chuan kum 2000 atang khan hman tan niin, kum tin hman a ni a. Thing tiak 17804 phun tawh zingah 8608 chu nungin, za zelah sawmli pariat vel (48.35%) nung ang a ni.

 

Attachment

  • Loading attachment...