Mizoram Governor Pu Kummanam Rajasekharan chuan ramngaw nei zau berte zinga Mizoram a nihna chu State dangte entawn tura chhunzawm zel turin kalkhawmte a sawm a. Green Mizoram Day-a thing an phun te chu duhtawk mai lovin, a puitlin thlenga enkawl zui turin a chah a ni. Sik leh sa inthlak danglam avangin Mizoram pawhin harsatna hrang hrang a tawh thu sawiin, heng harsatnate sukiang tur hian mitinin kan phak ang tawk theuhin hma kan lak a ngai a ni, a ti a. World Environment Day 2018 thupui pawh ‘Beat Plastic Pollution’ a nih angin Mizoramin plastic hman tlem kan zir a ngai a ni, a ti bawk. Tun thla tira Conference of Governors an hman zawh takah khan India Hnampa Mahatma Gandhi kum 150 champhaphak tlin lawm dan tur an sawiho thu a sawi a. Governor chuan Mizoram chu Green Mizoram, Clean Mizoram, Bio Mizoram leh Organic Mizoram nih a tum thu a sawi a ni. Heng tihlawhtling tur hian Governor chuan vawiina kalkhawmte leh Mizoram mipuite thawhpuiah a sawm a ni.

Chief Secretary Pu Arvind Ray chuan ramngaw pawimawhnate sawiin, boruak a tithianghlimin, sik leh sa danglam tur a veng a ti a. Mizoram Governor official function hmasa bera a tel thei chu lawmawm a tih thu sawiin, a thurawn la tura sawrkar a inhawn reng thu a sawi a ni.

Principal Chief Conservator of Forests (PCCF) Pu Lalram Thanga pawhin Green Mizoram Day kum 1999 atanga hman a nih dan te leh thing tiak nuai 37 bawr vel an phun tawh thu a sawi a. Kum 2014 atang khan District tinah District Level Committee on Green Mizoram din a ni tiin, DC te kaihhruaina hnuaia thing tiak puitling tura dam khawchhuak pawh a pun thu a sawi a ni. Hun lo kal zel turah zaa za an dam khawchhuah a beisei thu a sawi bawk a ni.

Durbar Hall-a programme zawh hian Heritage building kawtah Mizoram Governor, Chief Secretary leh PCCF te chuan thing tiak an phun a. Photo exhibition neih nghal a ni. He programme-ah hian sawrkar hotute bakah tlawmngaipawl hrang hrang aiawhte an tel a ni.