Mizoram hmun dangte rualin vawiin khan Lunglei-ah pawh “Thing phun belh la, a awmsa humhalh rawh” tih thupui hmangin District Level Green Mizoram Committee buatsaih ‘Green Mizoram Day 2018’ hman a ni a, he Ni puala inkhawm Chawngbawla Hall, Pukpuia neih ah Mizoram Youth Commission Chairman Pu Joseph Lalhimpuia chu khuallian a ni.

Green Mizoram Day 2018 hawnna inkhawm Lunglei Bawrhsap Dr Ankita Chakravarty, IAS kaihhruaiah Pu Joseph Lalhimpuia chuan ramngaw leh nungchate humhalhna kawngah mitin ten mawhphurna pawimawh tak kan nei theuh tih I hre thar ang u tiin hemi kawnga mipui mimir, tlawmngai pawl leh khawtlang hruaitute thahnemngaihna chu fakawm a tih thu a tarlang a.  Ramngaw kan humhalh that chuan kan nunna hnar pawimawh tak tuihna pawh kan humhalh tel a ni tiin tun dinhmunah Mizoramah tui mamawhna a pun zel laiin tuihna in tlem lam a pan zel chu pawi a tih thu a sawi bawk. Environment, Forest & Climate Change Department-in rampum huapa thingphun lama an hmalakna chu a fakawm hle a ni tiin heng thing phunte nung ngei tur leh ti puitling ngei turin kalkhawmte chu uluk taka enkawl zui turin a chah a. Thing phun nung tha sa tih chhiat leh tih danglama a awm fo thin chu pawi a tih thu sawiin Green Mizoram thiltumte hlenchhuak turin a ti chhe tu ni lova a humhalh leh enkawl puitling tu nih I tum theuh ang u, a ti bawk.

Lunglei DC Dr Ankita Chakravarty pawhin thu sawiin khawvel changkang chho zelah leilung hausakna, thing leh mau te kan ti chereu nasa hle a, chuvangin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin mawhphurna kan nei theuh a ni, a ti. DFO Lunglei leh District Level Green Mizoram Committee member te chungah lawmthu sawiin Lunglei DC chuan nungcha leh ramngaw te humhalh kawngah theihtawp chhuah zel turin a ngen a ni.

He hunah hian Lunglei DFO Dr. C. Vidhyasagar, IFS chuan report a pe a. Nungcha leh ramngaw humhalh kawngah Mizoram sawrkarin nasa takin hma a la mek a, State Action Plan on Climate Change duang chhuah a nih tawh bakah Mizoram sawrkar hmalakna pawimawh tak New Economic Development Policy (NEDP) kaltlangin EF&CC leh UD&PA Department ten thahnemngai takin hma an la mek a ni, a ti. Ramngaw leh nungcha humhalh leh kangmei ven kawngah theihtawpa hma an lak zel thu sawiin kumin Green Mizoram Day 2018-ah Lunglei District chu kangmei venna kawngah District ti tha ber 1^st Prize dawngin Chief Minister Pu Lal Thanhawla hnen atangin lawmman cheng 50,000 bakah thuziak leh Khitea Running Trophy an dawn thu a tarlang. EF&CC Department hmalaknate phur taka an tawiawm thin avangin Lunglei District mipuite chungah lawmthu a sawi bawk.

Vawiin Green Mizoram Day hawnna inkhawmah hian Lunglei District huamchhunga kangmei laka invenna (Fire Prevention) lama khaw tithate leh Department mahni thingphun enkawl thate hnenah Khuallian Pu Joseph Lalhimpuia’n lawmman a hlan nghal a. Chungte chu : Fire Prevention : 1) Phaileng S - Rs.50,000/- + Citation ; 2) Darzo - Rs.30,000/- + Citation ; 3)Thiltlang - Rs.20,000/- + Citation

Hemi kawnga chanchinbu tit ha te pawh lawman sem niin unglei Dc Dr Anita Chakravarty chuan lawmman a hlan a. Chungte chu : 1^st Prize -  Hlimthla Daily News paper – Editor Pu Laltlanthanga; 2^nd Prize – Vulmawi Daily Newspaper – Editor Pu K. Lalrinpuia; 3^rd Prize – Zochhiar Daily Newspaper – Editor Pu Lianchama Chhangte.

Green Mizoram Day hawnna inkhawmah hian Environment & Forests bakah Lunglei-a sawrkar department hrang hrang officers & staff, MJA Lunglei President leh Member te, College leh School zirtitu leh zirlai te, kohhran leh tlawmngai pawl aiawhte an tel tha hle a. Nikuma an thingphunna hmunte sam faiin a hungna an siam a, HATIM Campus, DIET Campus, Eklavya Model Residential School Campus, Jawahar Navodaya Vidyalaya Campus leh NIELIT Campus ah Department hrang hrang leh NGO’s 55 nos. te insemdarhin Thingphun tharna neih a ni. Thingphun tharte hi avaiin 346 nos. a ni. 

Tun dinhmunah hian Lunglei District chhhungah Green Mizoram Programme hnuaia Thing tiak sem zawng zawng hi 42,414 nos. a ni. Kum 1999 atang 2017 thleng in Green Mizoram Programme hnuaia Lunglei Forest Division a Thing tiak sem tawh zawng zawng zat chu 4,93,308 nos. a ni.

 Green Mizoram Programme 2018 pual hian Village Council leh NGO’s hrang hrangah thingphun a pawimawhzia te, kangmei laka kan inven a tul zia te bakah ramngaw humhalh a tul zia te lo puangzar a hma lakpui turin ngenna siam a ni bawk.  Tin, DEO Lunglei, SDEO ‘N’ & ‘S’, SDEO Lungsen, SDEO Hnahthial leh DPO, SSA te hnenah Green Mizoram pual hian an hnuaia sikul hrang hrangah thingphun leh Environment pawimawhna te zirtirna neiin thing pawh an sikul compound ah a tam thei ang ber phun tur a ngen an ni bawk. Heng bakah hian Lunglei Forest Division hnuaia Range Hqrs. Theuhah  Green Mizoram Day 2018 pualin programme te siam a ni a, thingte pawh phunin sem a ni bawk.