Vawiin khan Lawngtlaia Green Mizoram Day 2019 hman dan tur ngaihtuahin Lawngtlai District Level Committee on Green Mizoram chu an Chairman, Lawngtlai Addl DC Dr Andrew H. Vanlaldika MCS hovin a office chamber-ah an thu khawm.

Kumin Green Mizoram Day hi June ni 11 khian hman tur niin, thupui atan "Thing phunin sik leh sa vawng tha rawh" tih hman a ni dawn a. Vawiin thut khawmah hian Lawngtlaia Green Mizoram Day lo kalpui tawhna Lawngtlai leh Mampui inkar kawng kamah kumin hian sawrkar department hrang hrangte'n chan insemin thing tiak phun leh ni se tih a ni a. Thing tiak phun te vil zui bakah, mimal, pawl leh sawrkar department zinga ramngaw humhalh tha leh thingphun enkawl tha te ngaihven turin Lawngtlai DC Chairman-na hnuaiah Monitoring Committee din nghal a ni bawk.

Member Secretary report-a a lan danin kum kal ta, 2018 khan Green Mizoram Day-ah thing tiak 377 phun niin, he'ng zinga 70% chu tha takin a nung a. Kumin Green Mizoram Day-a thing phun tur hi LADC-a EF&CC Department chuan a tum dawn a ni.