588/2022-2023
Lawngtlai Ṭomir thla ni 23, 2022: Lawngtlai District Administration hma laknaa Lawngtlai District chhunga zirna tihhmasawn nana Pratham Foundation nen ṭang duna pawl nga aṭanga pawl sawmpahnih inkar zirtirtute tana capacity development training ruahman kalpui chhunzawm dan tur chu vawiin khan Lawngtlai DC Conference Hall-ah Bawrhsap Pu Amol Srivastava hovin sawi ho a ni.
He hunah hian District Administration lam, District Education Office lam, Lai Autonomous District Council leh Chakma Autonomous District Council-a Education Department ai awhte leh master trainer-te an kal khawm a. Additional DC Pu James Miahlung chuan an hma lak tawhna report pein, he zirtirtu training atan hian Lawngtlai District chhung block hrang hrang aṭanga thlan chhuah master trainer turte tan training buatsaih a nih tawh thu a sawi a. Master trainer-te'n sikul hrang hranga zirtirtute hnena training an pek chhawn dan tur ruahman tura ṭhut khawm buatsaih a nih thu a tar lang.
He hunah hian master trainer kal khawmte chuan Gurushala team aṭanga online leh offline-a training an dawn report pein, an thiamnate District chhung sikul hrang hranga zirtir chhawng tura sikula kal chilha training buatsaih dan tur ruahmanna sawi ho zui a ni.
Pratham Foundation te hian Vodafone Idea Foundation leh Indus Towers Limited te nen ṭang tlangin "Gurushala Teachers' Training" tih hming chawiin district administration te nen thawk hovin a thlawnin zirtirtute training an buatsaih ṭhin a. Lawngtlai District-ah pawh district administration hma laknain sawrkar sikul zirtirtute tan training hi kalpui tura ruahman a ni.
He training atan hian District chhunga zirtirtu hrang hrangte tan ni 2 awh online induction training buatsaih a nih hnuah Master Trainer tur thlan chhuah niin, March 2 - 4, 2022 inkar chhung khan Master Trainer turte hi Lawngtlai DC Conference Hall-ah Gurushala team te'n ni thum awh training an pe a. Training pe chhawng thei turin Sangau Block aṭangin master trainer 3, Lawngtlai Block aṭangin master trainer 9, Bungtlang 'S' block aṭangin master trainer 4 leh Chawngte Block aṭangin master trainer 9-in training hi an zo a ni.
Training 1st phase hi enchhinna angin block hrang hranga master trainer awm dan azirin sikul thlan chhuah bikah te kalpui phawt tum niin, Sangau block aṭangin sikul 1, Lawngtlai Block aṭangin sikul 4, Bungtlang 'S' Block aṭangin sikul 2 leh Chawngte Block aṭangin sikul 4 tinzawn phawt a ni a. DEO, LADC leh CADC aṭangin Nodal Officer ruat ṭheuh niin, anni kaihhruaina hnuaiah 1st phase kalpuina tur sikul, master trainer inkawp tur leh training pekna hmanraw mamawh te chhut hnuah, funding awm sa a nih loh avangin a ṭul dana training kalpuina tur sum ngaihtuah ni se, tih a ni.
Attachment
- Loading attachment...
