Zuk leh hmuam leh ruihhlo laka tleirawlte an fihlim a, an him theihna tura hma lakna tur ruahmanna, "Himna Project" Lawngtlai District chhunga kalpui dan tur sawi hovin vawiin khan Lawngtlaia education, health leh child protection lam official-te leh tlawmngai pawl hrang hrang ai awhte chu Lawngtlai Bawrhsap Pi Shashanka Ala, IAS hovin Lawngtlai DC Conference Hall-ah an thu khawm.

Meeting kaihruaitu Bawrhsap Pi Shashanka Ala chuan hun rei tak chhung inthlan vanga hna dang thawk mumal thei lova an awm hnuah hma sawnna hna hrang hrang te pangngai takin a kal leh thei tawh tih sawiin, member kal khawmte chu hmachhawp leh hmabak an neihte theih tawpa thawk turin a chah a. "Cancer khawpui" tia Mizoramin hriat a hlawh chu vanduaithlak a tih thu sawiin, he vanduaina lak ata hi tal chhuak turin khua leh tui zawng zawngin tih theih leh mawhphurhna kan nei theuh va, kan khawtlang nun leh vantlang hriselna ei chhetu zuk leh hmuam leh ruihhlo hi tang ruala kan do a tul tak zet a ni, a ti.

SDO (Sadar) Pi Rochuangkimi Khenglawt chuan Himna Project chungchang sawi fiahin, hemi hnuaia hma lakna atan Lawngtlai District-in Rs nuai 25 a dawng tih a sawi a. Project kalpui nana sum dah chu tangkai leh daihzai thei ang bera hman dan tur ngaihtuah turin member-te a ngen nghal bawk.

Naupang leh tleirawlte zinga zuk leh hmuam leh ruihhlo hman sual awm thin a lo bo theihna tura hma lak ngaihna lai leh hma lak dan tur hrang hrang rawt chhuaha sawi ho a ni a. Naupangte kaihruai tur leh kawng dik kawhhmuha zirtir tur chuan puitling zawng zawngin mawh kan phur vek tih uar taka sawi lan niin, zirlaite hmuha zirtirtuin mei a zuk chuan chu zirtirtu chuan naupang chu sual ti turin a zirtir a ni tih leh puipunna hmuna mei zuk chu mei zuk fak mawina tluk a ni tih te sawi lan a ni bawk.

Himna Project hnuaia hma lakna kalpui nan hian tun atan chuan sikul 25 vel thlan chhuah phawt a, chutah chuan Himna Club dinin, resource person-te'n zuk leh hmuam leh ruihhlo laka inthiar fihlim tura naupang kaihruai turin hma la se, tih a ni a. Hma lakna atan hian rilru hriselna lam pawh khawih tel ni se, tih a ni bawk.