Sawrkar policy thar, Socio-Economic Development Policy (SEDP) hnuaia Lawngtlai District chhunga line department hrang hrangte'n hna an thawh dan tur leh an mamawh ruahmanna leh rawtna an siamte chu vawiin khan Lawngtlai Bawrhsap Pi Shashanka Ala, IAS hovin Lawngtlai DC Conference Hall-ah thlir ho a ni.

Chairman, Lawngtlai Bawrhsap chuan line department hrang hrangte'n District hma sawnna tura hna an thawhna kawngah hma lakna inthuah a awm loh nan te, hma lak hona leh inpuih tawn theihna kawng hriat theih nan te meeting chu koh a nih thu sawiin, department hrang hrang hna thawhte District pumpui tan a lo chhenfakawm zawk theih nan DC office atanga khai khawm tum a nih thu te a sawi a. Department hotu kal khawmte chu anmahni zawn theuhvah District tana ruahmanna chhenfakawm leh lian tak siam tum turin a chah.

He hunah hian line department hrang hrang - Agriculture leh a kaihhnawih department-te, works department-te, health, education leh social welfare lama SEDP hnuai atanga hma lakna tur rawtna awmte thlir ho a ni a. Lawngtlai District chu Mizorama district hnufual ber a nih avangin SEDP sum pawh district dang aia tam zawk hai luh a tul thu sawi lan niin, sum dawnte daihzai leh awmze nei taka hman a nih theih nana department hrang hrang tan ho theih dan tur te pawh sawi ho a ni.

Attachment

  • Loading attachment...