Vawin khan Chhimtuipui Wildlife Division, Lawngtlai buatsaihin LADC Conference Hall-ah "Sik leh sa danglam chho zel chungchang zir hona" hun hman a ni a. Lawngtlai District MJA President Pu ZD Dengngura chu khuallian a ni.

Pu ZD Dengngura chuan khawvel lum chak lutuk (global warming) leh sik leh sa danglam nasa ta lutuk (climate change) chu khawvelin a buaipui a ni a, a chhan bulpui ber nia lang chu ramngaw kan tichereu nasa lutuk hi a ni, a ti a. Khawvel nuam tak siam leh tur chuan a tam thei ang ber thing phun a, ramngaw tha siam a pawimawh a ni, a ti a. Kangmei tichhuak lova ramngaw awm sa humhalh te, a chhunga nungchate dimdawi leh humhalh tel te chu sik leh sa danglam nasa zel tur danna atana hmanraw pawimawh tak pakhat a ni, a ti bawk.

Vawiina "sik leh sa danglam chho zel chungchang zir hona" hi Ngengpui Wildlife Range-a Range Officer (RO) Pu F.Lalsangzuala'n kaihruaiin, Chhimtuipui Wildlife Division, Lawngtlaia Deputy Conservator of Forests (DCF) Pu PC Lalchhandama'n kal khawmte zirtirna a pe a. Sik leh sa danglam nasat chhan te, chumiin nghawng tha lo a neih hrang hrang te, a veng tur leh siam tha tura tih tur pawimawh te leh mi dang zirtir chhawng tura thil tul hrang hrang te zir ho a ni a. Ngengpui Wildlife Sanctuary leh Phawngpui National Park chhehvel khuatea Young Lai Association leh Village Council member mi 140 velin training hi an chhim a ni.