Vawiin chawhma khan Rural Development Department minister Pu Lalruatkima chuan Sihhmui Community Hall hmunah Community Hall Lungphum a phum a, he hunah hian Pu Zothansanga, Bialtu MLA in a tawiawm a ni.

Rural Development Department Minister Pu Lalruatkima chuan Sihhmui chu hmun pawimawh tak leh la pawimawh chho zel tur anih thu te, Aizawl khawpuithlai leh balu mamawh tam tak lakna leh hun eng engemaw hrang hrang vanga Sairang leh a chhehvel tlawhtu an tam thin zia leh chung zinga vanduaina tawk an awm thin changa Sihhmui khawtlang tena chhanchhuah leh ruang zawn kawngahte an thawh hlawk ziate sawiin,” Community Hall, a tul ang apianga hman tur, chhiat that thlen chang pawh a ruahmanna siam zung zung theihna hmun tur kan mamawh hle a, hetianga hma lakna a awm hi a lawmawm hle a ni” a ti. Minister Pu Lalruatkima chuan Sihhmui Community Hall sak meka Sihhmui khawtlang inpeknate fakawm a tih thu sawiin,” Hall tha tak neihna tur atana khawtlang inlungrualna leh in inpumkhatna a that zia a lang chiang hle a ni,” a ti a,Sawrkar hmalakna tawiawm a, neitu nihna thinlung nena enkawl chhunzawm zel turin duhsakna a hlan nghal bawk.

Minister Pu Lalruatkima chuan sawrkar flagship programme, Socio Economic Development Programme (SEDP) hnuaiahman tur sum ruahman tawh anih thu leh hmasawnna ruhrel hrang hrang, mipuitena kan chhawr tangkai tur  a awm thu te leh mipuite thlawpna tello chuan sawrkar hmalaknate a hlawhchham thin thu a sawi a,” Ram kan siamna turte, kan hnam kan dinchhuahna turte, kan khawtlang leh keimahni chhungkua kan dinchhuah theihna turte in he sawrkar flagship programme SEDP hi engtinnge kan lo dawnsawn ang tia ngaihtuahna kan lo hman lawk a tul hle a ni,” a ti a,” Mipuiten ‘Sawrkar ta hi ka ta a ni a, Sawrkar chu ka ta anih ang bawkin Sawrkar ta pawh ka ni’ tih hingaihtuah nawn fo ang u,” a ti bawk.

Pu Lalruatkima chuan,Mizoram sawrkarin kawng siam that a ngaih pawimawh thu sawiin hmun hrang hranga kawng chhia te chu chak taka siam that hna thawh mek a nih thu a sawi. Minister chuankan ram economy siam that nan Mau hi tangkai taka hman anih thei thu a sawi a, hun reilote chhunga thang lian thei, insakna leh bungraw hrang hrang siam nana hmanraw tangkai anih mai bakah sik leh sa inthlak thleng nasa dolet na atan pawh a thil tangkai tak a nih thute sawiin,” Kan Flagship programme a pawimawh berte zingah kan dah a ni” a ti.

Minister chuan Sihhmui leh a chhehvel vengte chu Rel lu nghahna hmun tur anih angin veng mipuite chu mikhual dawl zo turte, hnamdang tawng zirna lam a hmasawn turte, mizo nunze mawi chawi nung tlat turte in a fuih a, faina kawngah pawh entawntlak a awm turin a chah bawk a ni.

Bialtu MLA Pu Zothantluanga chuan MLA atana a bial mipuiten duhsakna lan tira thlan tlin anih avangin lawmthu a sawi a, Hall sak meka khawtlang mipuite inpekna te chu fakawm tiin,” Khawtlang ro kan buatsaihna kawngah hian tih tak takna nen, rinawmna nen thil tha nei tura in inpek tawhna, hnatlanga tha tam tak inlo sen tawhna a ropui hle a ni” a ti.

Sihhmui Community Hall Lungphum phumna hun hi Pu J Laltlanthanga, Chairman, Hall Committee, Sihhmui in a kaihruai a, Pu David MS Dawngzuala, Secretary, Hall Committee in technical report pein Pu Lalthlengliana, Vice Chairman in lawmthu sawina hun a hmang bawk a, Pu Lalnunhlua, Joint Director Rural Development Department, Pu A.Chhalai, E.E, Sihhmui NGO hrang hrang hruaitute leh khawtlang mipui thahnem takin an hmanpui a ni.