Champhai District I & PR leh MJA ten Champhai District hmarlam tlangdunga hmasawnna ruhrel hnathawh lakallai an tlawh kualmekah,  NE Khawdungsei,  Khawkawn leh Chiahpui khaw chawmna tur Nizung chakna hmanga tuilak hnathawh mek an fan rualin,  NABARD sum Rs 10.2 Crores leh a doletna Mizoram sorkar sum Rs 1.1 Crores a pumpuia Rs 11.38 senga siam mek Mimbung leh Hrianghmun khaw chawm tur tuilak (Combined Mimbung & Hrianghmun Solar Pumping Water Supply Scheme) hna thawh mek anih dan chu PHED hotuten tarlangin,  Mimbung leh Hrianghmun khawmipui 4564 in hniang hnar taka tui an dawn theihna hnathawh mek chu kumin chhunga zawhfel hman an beisei thu an sawi.

Mimbung leh Hrianghmun khaw chawm tur hnathawh mek, (Combined Mimbung & Hrianghmun Solar Pump Water Supply Scheme)ah hian Hrianghmun khaw hnuai a Tuiching Lui hnar,  thalva-ekchar lai pawh a tui Minute khat a Litre 198 luangchhuak thei chu Nizung chakna (Solar Plate) Kilo-Watt (KW) 200 chakna hmangin Meter 150 zet asangah hruai chhoh (Pump) tura duan niin,  tui a natna hrik thahna khawl (Ozonator) hmanga tui thlitfim anih hnuah Meter 130 a sangah tui thianghlim Pump chhoh leh tur a ni a.  Heta Tui dahkhawlna Zem pahnih atang hian Mimbung leh Hrianghmun khawchhungah lakluh ve ve tura duan a ni.

He Project "Combined Mimbung & Hrianghmun (Solar pumping) Water Supply Scheme hi nakum March thla a zawhfel hman tura duan anih laiin,  kumin chhung ngei a zawh hman an beisei thu PHED hotute hnen atanga dawn anih bakah PHED in an thawh tur 85% chu an zofel tawh a ni.  He hna hi zawhfel anih hunah chuan tui harsatna khaw pahnih Mimbung leh Hrianghmun khaw mipui 4564 ten nitin tui litre 60 chuang theuh hniang hnar takin an dawng thei tawh dawn a ni.

Heng khaw 2 a tuisem dan turah PHED chuan vantlang tuipekna (Public Water Point) siam lovin, chhungkawtin-in an lak theih dan tur (T Cluster) hmanga duan (private connection) hman vek tur niin,  khaw 2 mipuite duhthlanna-in PHED kutkhawih kher lova;  an mahni enkawl zui theih tura ruahman a ni bawk.  Champhai District chhunga Nizung chakna hmanga Kelkang khaw tuilak chu a hlawhtling hle a.

Tuna NE Khawdungsei,  Chiahpui leh Khawkawn chawmtu tur tuilak (Combined NE Khawdungsei, Chiahpui and Khawkawn Solar Pumping Water Supply Scheme) leh Mimbung leh Hrianghmun khaw chawm tur luilak (Combined Mimbung and Hrianghmun Solar Pumping Water Supply Scheme) hnathawh mekah, he hnathawh tlawhtu Champhai District I & PR leh MJA te mit a tlung hle a.  An hna a that bakah zawh hun tur bituk aia hma a mipui chhawr theih tura tan an lakna leh ram rotling tur ruhrel an din kawngah fakawm an ti hle.