Vawiin chawhnu dar 1:00 khan Mizo Zirlai Pawl Headquarters Serchhip chuan zirlai tithate chawimawina hun Serchhip Auditorium ah an hmang a, Pu C. Lalramzauva, Adviser to Chief Minister, Mizoram chuan khuallian niin a hmanpui.

Pu Ramzauva chuan zirlai ten result tha tak tak an nei thin leh ram pum huapa lang pha chawimawi tur an awm chu a lawmawm hle a ni, a ti a, tun aia tha zawk result nei thei ngei tura tan la turin zirlai kalkhawmte, zirtirtu leh nu leh pate a chah bawk a ni. Kum kalta lama zirlai kan chawimawite kha khawiah nge an awm a, chawimawi tlakin an la awm zel em tih chu ngaihtuah ngai tak a nih thu sawiin, chawimawi dawnah hian tawp mai lo se, hmalam pana kal zel a, ram leh hnam tan eng nge ka tih ve theih tih ngaihtuah chungin tan la zel turin a chah bawk. Talent tha tak hi tihpun anih loh chuan engmah ani chuang lova, mi zawmthaw tan hlawhtlinna a awm ngai lo, a ti a. Vawiina zirlai tithate chawimawi hun hmang tura lo kal zawng zawngten chawimawina dawng ve thei ngei tura tan la in, he hun hi hun khawhralna satliah mai a ni lo ani, tih tilang thei theuh turin a sawm a. Serchhipa zirlaite chu hmun danga zirlai dangte aiin an hniam bik hauh lo a ni, tih tilang turin Central Service leh State Service ah te inziak tling thei ngei tura tan la turin a chah bawk.

Laltlanmawia, Secretary, MZP Headquarters, Serchhip chuan report a pe a, Serchhip khaw chhunga High School leh Higher Secondary School atangin HSLC exam beitu mi 246 awmin mi 217 in hlawhtlinna an chang a. HSSLC examah Arts Stream ah mi 143 in exam an hmanchhawn a, mi 126 an passed a, Science Stream ah mi 36 examin mi 25 an passed a, Commerce ah mi 7 examin mi 4 an passed a. An zinga atang hian HSLC Distinction-a passed chin mi 22, HSSLC First Division a passed mi 34 bakah, Serchhip mi, hmun danga zir ram pum huapa titha mi 2 hnenah chawimawina thuziak an hlan a ni.

H. Lallawmkima, President pawhin thu sawiin ram leh hnam humhalh nan zirna a pawimawh a, Social Media leh online games ah te chintawk hriatthiam a tul thu a sawi a. Hnam dang nupui pasal nei lo turin zirlai kalkhawmte a chah bawk.

He hun hi R. Lalmalsawma, Vice President, MZP Headquarters, Serchhip chuan a kaihruai a, MZP Gen. Headquarters Aizawl atangin Michael Lalramsanga, Treasurer chuan he hun hi a hmanpui a, Serchhip khaw chhunga High School leh Higher Secondary School zirlai thahnem tak an tel bawk.