Vawiin chawhma dar11:00Am khan DRDA conference Hall-ah District bawrhsap Pu Bhupesh Chaudhary IAS, chuan amah leh a  subordinate officer ten an duanchhuah KAWNG KAWHHMUTU (MENTORSHIP) programme  a tlangzarh. He KAWNG KAWHHMUTU programme thupui hi  kan fate, kan hmathlir ( Our children, our future) tih a ni.

Vawiin programme hi Miss NC.Elisia, Superintendent, Observation Home, in a kaihruai a. Pu H.Zonunmawia, Election officer, in welcome speech sawiin,  Pu T.Malsawmsanga,PD, DRDA in Kawng kawhhmutu programme duanchhuah a nih dan leh a thiltum te chipchiar taka a sawifiah hnuah, bawrhsap Pu Bhupesh Chaudhary chuan he mentorship programme hi a tlangzarh ta a ni. Pu R.Lalremsanga, Addl.DC pawhin zirtirtu te fuihna thu sawi pahin he kawng kawhhmutu program hlawhtlinna hi mipui leh sawrkar thawhhonaah a innghat a ni, a ti.

He Kawng kawhhmutu programme hi  Pu Bhupesh Chaudhary kaihhruaina hnuaia Disitrict  Administration, Siaha in a duanchhuah a ni a.

He programme in a tum ber chu kan  District chhunga Sawrkar enkawl Middle leh High School naupangten an zirna kawnga tunaia hma an sawn theih nana khawtlang mipui te nena mumal taka thawh ho dan duan te, Central leh State hnuaia sawrkar hnatawk te he programme a lo in volunteer a. He Programme thiltum leh hmalak dan tur a duante phur taka bawhzui tura sawm te a ni.

He programme-ah hian DC chairman-na hnuaiah District Level Executive Committee member 15 awmna leh Core Group Mentors  member 6 awmna din a ni a.

Program kalpui dan tur tlangpui chu:-

1) He programme hi volunteer based programme anih angin, sawrkar hnathawk a duh apiang tan a tel theih a. volunteer te hi pawisa thawh kher programme hian a phut lova, thawh duh tan erawh engtik lai pawhin a thawh thei ang.

2) Mentor pakhat in school 4/5 vel chan bik/ enkawl bik a nei anga,  thla 1 chhungin vawi 1 tal a school chan te a tlawhchhuak ang. Zirtirtute leh zirlaite nen inkawm hovin, an harsatna leh tanpui an ngaina zawnah a tul angin hma a lakpui thin ang.
3)Mentor te chuan zirlaibu piah  lama an zirna kawnga tanpui thei tur leh an khawthlir tizau thei tur lehkhabu chhiar tur ngaituahsak dan te pawh an dap ang.

He programme sum hnar ber tur chu mi inphal te thawhkhawm a ni rih anga, programme hlawhtlin dan a zirin sawrkar Fund leh CSR atang te in remchanna ngaituah a ni ang.

Vawiin programme-ah hian Sawrkar enkawl High school leh Middle School-a Principal leh Headmaster te, NGO hrang hrang aiawhte, Chanchinbu mi te leh  sawmbik te an telkim hle a ni.

Kawng kawhhmutu programme tlangzarhna inkhawm hi Pu N.Vabeiratlua DIPRO in lawmthu sawina in a khar ta a ni.