Vawiin hian Lawngtlai Central YLA Ground ah HLUKHLA CHAPCHAR KUT 2016 hman a ni a, Pu C. Ngunlianchunga, Minister of State chu Kut Pa niin Bawrhsap, Pu J. Hmingthanmawia chu Hlukhla kut thlengtu a ni a, CEM, LADC Pu VL Hmuaka chu Chapchar Kut thlengtu a ni thung.

Lawngtlaiah hian Chapchar Kut hi Lai hnam Kut ropui tak Hlukhla Kut nen a ruala hman dun thin a ni a, kuminah pawh he kut hi Central Young Lai Association huaihawtin CYLA Playground ah hman a ni.

Kut Pa, Pu C. Ngunlianchunga chuan, hnamin a ziarang a hloh chuan hnam chu a bo ta tihna a ni. Chuvang chuan keini Zofate hian kan hnam ze hrang hrang, mawi tak takte hi kan hloh a thiang lova, Kristian kan nihnna dal lovin nasa zawkin kan chawi nung deuh deuh tur ani, a ti a. Hlukhla Chapchar Kut hmang tura kalkhawm zawng zawngte hlim taka hmang turin duhsakna a hlan a ni.

Hlukhla Kut thlengtu Lawngtlai DC Pu J. Hmingthanmawia pawhin thinlung thianghlim tak leh kan pipute min pek kan hnam ze tha tinreng chawinun zel duhna thinlung pua nung tlat turin mipuite a sawm a. Hlukhla Chapchar Kut hmang tura kalkhawmte leh a buatsaihtu CYLA te chungah lawmthu a sawi ani.

Pu VL Hmuaka CEM, LADC pawhin thahnem ngai taka mahni zawn theuhva ram leh hnam tana thawka, hnam ze mawi tak takte chawinung reng turin kalkhawmte a fuih bawk.

Hlukhla Chapchar Kut ah hian Branch YLA hrang hrangten hnam lam leh zai chi hrang hrangte an entir a, MUP Sub Headquarters ten Hlado leh Bawhhla nakah Sakei lu aih an entir a. Bazar Branch LWA ten Costume Parade neiin, zaithiam hrang hrangten hun an hmang bawk. Organising Committee ruahmanna in Hlukhla Miss 2016 thlanna buatsaih a ni bawk a, Miss ah hian Nl. MC Lalruatfeli, Chandmary chu thlan niin pahnihna chu Nl. Zaithansangpuii, Electric a ni a, pathumna chu Nl.VL Remruati Fanai, Chandmary chu thlan ani. Tin, traditional dress a inthuam naupangte hnenah lawmman an hlan bawk.