No.537/2020-2021

Lawngtlai, Tau thla ni 23, 2020: COVID-19 vanga inkharkhip kalpui mek laia ei leh bar deh chhuah kawnga ramin harsatna a tawh loh nana hma latu Task Force on Agriculture Inputs ruahmanna angin Lawngtlai District chhunga khaw hrang hranga a mamawhte tan Lawngtlai Horticulture Division chuan vawiin khan thlai chi an sem.

Thlai chi hi Agriculture Department kaihhruaina hnuaiah khaw hrang hrangah a mamawh tur zawn a ni a. Lawngtlai District chhung khaw hrang hranga Village Level Task Force (VLTF)-te'n an mamawh zat tur an report atangin Aizawl lamah thlai chi mamawh dan hi thlen a ni a. Horticulture Department atangin thlai chi sem tur hi lo thlengin, vawiin khan Lawngtlai Horticulture Division chuan District chhung khaw hrang hrang VLTF-te hnenah an sem darh ve leh a ni.

Lawngtlai District chhunga kut hna thawktu a mamawhte hnena sem chhuah tura thlai chi lo thleng hi antam (mustard) kg 25, bawrhsaiabe (bindhi) gram 80, bean (French bean) kg 40, behlawi dum (black cowpea) kg 60, behlawi var (giant cowpea) kg 30, behlawi sei chi (yard long bean) gram 40, changkha (bitter gourd) gram 250, fanghma (cucumber) gram 50 leh hmarchapui (hot pepper & chilli) gram 80 a ni a. He'ng thlai chite hi Open Pollinated Varieties (OPV) niin, thlai chi hi a theih chin chinah theh lo va, a tuha tuh ni thei se tih chu Task Group on Agriculture Inputs duh dan a ni.

Lawngtlai Divisional Horticulture Officer Pu C. Lianluaia chuan inkharkhip kalpui mek a nih vang leh khua/veng chhunga a mamawhtu tak tak chauhte'n thlai chi hi an dawn theih nan VLTF kutah a hlawma hlan a nih thu a sawi a. VLTF-te hian an khuaa a mamawhte hnenah a tul dan azirin an lo sem darh ve leh dawn a ni.