Vawiin khan National Bank for Agriculture and Rural Development (NABARD) hnuaia Tribal Development Fund (TDF) sum atanga Lawngtlai RD Block huam chhung khaw sawm (10)-a World Vision India (WVI), Chhimtuipui Area Development Programme (CADP)-in mi rethei leh harsa zawkte dawm kan nana 'Integrated Tribal Development Project' an kalpui tur chu Lawngtlaia Central YLA Hall-ah Agriculture Minister Pu C. Lalrinsanga'n a hawng.

Pu C. Lalrinsanga chuan ITDP chuan ei leh bara intodelh tur te, sum deh chhuahna ngelnghet nei tur te, sum khawl tur leh vantlang hriselna atan tea zirtirna leh hma lakna hrang hrang a huam tel avangin hma sawnna tura mamawh a kim vek a, a kalpuina tur khuate leh Lawngtlai District pumpui tan pawh malsawmna ropui tak a nih dawn avangin a hlawhchham thiang lo, a ti a. Chaw leh chawhmeh leh ei siamna bawlhlo hrang hrang, Mizo chokaa mikhual cham rengte hnawh chhuah a, mahni thar chhuah ngei hmanga thlak a hun tawh a, phai atanga damdawi hmanga sawngbawl thlai lo kal thin, hriselna atan pawha pawi theite chu malmak a, mahni thar chhuah thlai thianghlim leh hrisela intodelh tura tan lak a tul tawh tak zet tih sawiin, chumi atan chuan ITDP hma lakna hi hlawhtlinpui a pawimawh a ni, a ti. Kan rinna, rinawmna leh khawtlang inrelbawlna tha min pal pawrsaktu chu sum ngainat hi a nih avangin tanpuina sum lo dawn chungchangah pawh fimkhur a ngaih thu sawiin, Agriculture Minister chuan tanpuina kan hmuh pawh ei ral nghal mai lo va, hna chhenfakawm thawh nana hman thiam a tul, a ti a. ITDP project tha tak lo kal chu ruah mual liam anga awmze nei lova liamtir mai lo va, lo chhawr tangkai tum turin beneficiary kal khawmte chu a chah nghal.

Vawiina ITDP hawnna hun hi Baptist Church of Mizoram (BCM) Lawngtlai Area Executive Secretary Rev. R. Lalnunzira'n tawngtaina hmanga hlanin, World Vision India hnuaia Technical Programme-a Head Dr James Neil Devasahayam Dk chuan khuh hawnna thu a sawi a. NABARD-a District Development Manager (DDM) Pu Evan T. Munsong chuan ITDP project chungchang a sawi fiah a. NABARD Mizoram Regional Office-a General Manager Pu SN Mallick leh WVI-a Senior Programme Director Pu Anil Joseph te pawhin thu sawiin, WVI Chhimtuipui ADP-a Programme Manager Pu Paul T. Touthang chuan lawm thu sawiin hun a khar a ni.

Integrated Tribal Development Project hi tribal community thlan bik khaw sawm (10) - Chawnhu, Mampui, Chawntlangpui, Sihtlangpui, Kawlchaw West, Kawlchaw East (Siaha District), Saikah, Paithar, R.Vanhne leh Rulkual-ah te kum 6 chhung kalpui a ni dawn a. He'ng khuatea chhungkaw 200 thlan chhuah niin, thei huan siam leh ran vulh hmanga ei zawnna ngelnghet an neih theih nan hma lak a ni ang. He project hi World Vision India, Chhimtuipui ADP-in an enkawl dawn a, a kalpui nan hian cheng vaibelchhe 1.7 ruahman a ni.

ITDP hawnnaah hian ITDP atana beneficiary thlan chhuahte koh khawm niin, a buatsaihtu NABARD leh World Vision India lam an tel bawk a. Minister hi Agriculture Development Board Vice Chairman, Lawngtlai East Bialtu MLA Pu H. Biakzaua bakah, Lunglei leh Lawngtlai District-a sawrkar official-te leh MNF party mi leh sa eng emaw zatin an tawiawm a ni.

Attachment

  • Loading attachment...