Sports Minister Pu Robert Romawia Royte chuan Siaha District Sports Committee(SDSC) leh Siaha District Football Association(SDFA) te ngenna angin, hun rei tak hnathawh an lo chawlhsan tawh, phullem phahna tura buatsaih mek Meisatla field chu tukin zing khan a tlawh.

Pu Robert hi SDSC leh SDFA hruaitute bakah Siaha MJA hruaitu ten an tawiawm a ni.

SDSC leh SDFA hruaitute chuan Meisatla field phullem phahna tura buatsaih hnathawh chu duhthu a sam lo hle thu minister hnenah  lo thlenin,  a chan Department hnuaia hmalakna ni lo mahse Sports Minister a nihna zawn atanga hma lakpui turin an lo ngen a ni.

Phullem phahna tura buatsaih mek Meisatla Field-a hnathawh hi  contractor hian hun rei tak  a chawlhsan tawh a. Hnathawh tawh sa pawh duhthu a sam lo hle a ni.

Sports Minister chuan Aizawl a thlen hunah Deputy Chief Minister hnenah field dinhmun hi a lo sawipui tur thu SDSC leh SDFA hruaitute hi a hrilh hlawm a ni.

Meisatla field-a  phullem phah nan hian NEDP atangin Cheng vaibelchhia Rs. 6 chuang ruahhman a ni a,  UD&PA hnuaia thawh a ni. Contractor hi Great Sports Infra ltd Hyderabad te an nih thu  SDFA hruaitu ten Minister hi an hrilh a ni.