2477/2025-2026

Lawngtlai, 17th September 2025: Lawngtlai District AIDS Prevention & Control Committee (DAPCC) bultumin vawiin khan 'IEC Campaign leh HIV Test Drive Campaign 2025' hawnna chu Chandmary Inpuiah neih a ni a. Pu Donny Lalruatsanga, Lawngtlai Bawrhsap chuan hmanpuiin, Campaign- hawnna hi a nei.

Pu Donny Lalruatsanga chuan kalkhawmte hnena lawmthu sawiina neiin, sâwt tak leh district dangte entawn tlâk ni tura Campaign a hawn thu a sawi a. Zirlaite chu HIV/ AIDS chungchanga mithiamte zirtirna pek chu uluk taka ngaithla leh zâwm a, midangte hrilhhriat kawngah theihtawp chhuah turin a chah a. Ruihhlo hmansual avanga kai theih natna hrang hrang laka fihlim tura chahin, Syringe thianhlimlo hman bakah a hun lo a mipat hmeichhiatna hmang lo tura mahni in inthunun fo thin turin a fuih. Zirlaite chu he natna an kai a nih chuan an nih tum leh nih tur angte an ni ngai dawn lo tih rilrua hre reng turin a chah a. Ruihhlo laka fihlim lote tan chhungkaw nuam a din theih loh a, chu chuan khawtlang leh ram nuam zawk din a ti har em em tih tarlangin, Ruihhlo laka fihlim tlat turin zirlaite a fuih a. Bawrhsap chuan zirlaite chu ram leh hnam innghahna an ni tih inhriaa, ruihhlo laka fihlim tur leh ram leh hnam tana mi tangkai leh chhuanawm nih tum tlat zawk turin a fuih a ni.

Bawrhsap chuan khawvel changkannain a tha leh tha lo zawnga nghawng a neih nasat zia tarlangin, a thalo zawng hian mimal, chhungkua leh khawtlangah harsatna a thlen nasa hle a ni, a ti a. A bik takin HIV/AIDS vei an tam ta lutuk chu veiawm a tih thu sawiin, Ruihhlo do kawngah harh thar a hun tawh hle a ti. Ruihhlo do kawngah Sawrkarin theihtawp chhuahin, NGO leh Kohhrante pawhin theihtawp an chhuah reng a, heti chunga HIV/AIDS vei an pungta zel chu veiawm a tih thu tarlangin, Ruihhlo do kawngah mitinin mawhphurhna an nei tih hrechiang turin a chah. Pu Donny Lalruatsanga chuan HIV/ AIDS in min rûn mêk lai hian tumah inthlahdah theih a ni lo a, lungrual taka do ho a tul a hle a, Ruihhlo do kawngah bul i tan thar leh ang u tiin kalkhawmte, NGO, Kohhran leh Lawngtlai mipuite a sawm nghal bawk.

Dr. Lalramhluna Tochhawng, Sr. Medical Officer, chuan kalkhawmte lawmna thu sawiin, Pi S. Ramdinengi, Councellor, ICTC chuan HIV/ AIDS chungchangah zirtirna a pe a. Pu H. Lalthakima, PM Core Composit, chuan ' Awareness on Substance Abuse' tih thupui hmangin zirtirna hun a hmang bawk.

Vawiin hun hmannaah hian Lawngtlai District AIDS Prevention & Control Committee (DAPCC) Member, leh Lawngtlai khawpui chhunga High School, Higher Secondary School leh College atangin zirlai tha hnem tak an tel thei a. Dr. Remlalnghaki, Member Secretary, DAPCC - chuan lawmthu sawina neiin hun a khar.