4088/2023-2024

Lawngtlai dated 8th March 2024: Vawiin chawhma khan LADC Hall, Council veng, Lawngtlaiah District Legal Services Authority leh District Hub for Empowerment of Women tangkawp buatsaihin International Women’s Day lawmna hun hman a ni a. Pi Zoengi, Vice President, MHIP Sub. Hqrs, Lawngtlai chuan hun kaihruaiin Pu Abraham Beirazi Khithie, Addl. DC chu khuallian a ni.

Khuallian Pu Abraham Beirazi Khithie, Addl. DC chuan hmeichhiate chuan an hlutna an hriat a pawimawh thu sawiin hmeichhe rintlak awmna chhungkua chu chungkaw hlawhtling an nih fo thu a sawi a. In chhung khur, pasal leh fanau enkawltu hmeichhiate chuan an phu ang tawk fak leh chawimawi an hlawh loh thin thu sawiin nu nih hi hna ropui ber te zinga a ngaih thu a sawi. Kawng hrang hrang a fate an hlawhtlin theihna tur chuan nu ber an pawimawh thu, Addl. DC chuan sawiin nu te hmalakna hi pasal ten an tawiawm that a pawimawh thu a tarlang a. Ram changkang apiang ah dan ngaih pawimawhna a nasa a, hmeichhiate sahimna turin dan tha tak takte duan thin a nih thu sawiin, heng dan kan neih te hriatchian leh hman tam chu hmeichhiate hmasawnna leh zalenna tizualtu tur a nih thu a sawi.

Pi Chhunkungi, Treasurer, MHIP chuan International Women’s Day pian chhuah dan tarlanna hun hmangin International Women’s Day 2024 thupui ‘Inspire Inclusion’ chu hmasawnna kawng hrang hrang a hmeichhiate tel ve theihna khawvel siam a nih thu a sawi a. Pu Z.Laldinhuala, DHEW chuan sawrkar hmalakna hnuai a hmeichhiate tan a hamthatna awm hrang hrangte leh hmeichhe dinhmun tleu palhte tan a bultan that lehna hmun, Swadhar Greh, One Stop Centre leh Mission Shakti kalpui a nih dan tarlanna hun a hmang bawk a ni.

Pi Saimawii Sailo, Protection Officer (NIC) chuan ‘Child Rights and its related issues’ tih thupui hmangin zirtirna a pe a, Pi Jothansangi Tlau, CJM & Secretary, DLSA chuan ‘Women’s safety and Security’ leh ‘The Sexual harassment of women at work place (Prevention, Prohibition and Redressal) Act 2013’ tih thupui hmangin powerpoint presentation a pe bawk a ni.