922/2023-2024

2023 Nikir thla ni 26: Vawiin hi khawvel pum huapa damdawi hman sual dona ni, "International Day Against Drug Abuse & Illicit Trafficking" a nih angin, tukin zingkar khan Lawngtlai District Police huaihawtin Lawngtlai Bazara Areopagy-ah hemi pual hian hun hman a ni.

He hun hman hi Lawngtlai Sub-Divisional Officer (Sadar) Pu Daniel Sailo chuan Khuallian niin a hmanpui a. Damdawi hman khawloh chu chhungkua leh khawtlang nun hona boruak tichhiaa tibuaitu, ṭhalai nunna tam tak suattu a nih avangin nasa taka do a ṭul tih a sawi a. Chhungkaw tin min luhchilh thei a nih avangin a dona kawngah indah awl bik thei kan awm lo tiin, khawtlang nuam zawk siam tur leh ṭhalaite nun chhan nan, damdawi leh ruihhlo hman khawlohna tirem turin i ṭang tlang ang u, tiin Lawngtlai District mipuite a sawm a. Ruihhlo chi hrang hrang, a bik takin damdawi chu vawi khat tih-ah pawh a ngawl vei mai theih a nih avangin ti chhin lo tur leh a laka inthiar fihlim tlat turin zirlaite chu a chah bawk.

He hun hi Lawngtlai Additional Superintendent of Police Pu C. Lalruatkima chuan kaihruaiin, kal khawmte lawmna thu leh hun hman chhan tlangpui a sawi a. Ruihhlo dona leh a ṭhat lohzia inzirtirna peng khat atana Lawngtlai District Police-in high school zirlaite tana essay inziahsiak leh lemziak intihsiakna an buatsaih lawmman sem a ni a. Lawngtlai District Police, sawrkar official dang leh zirlai kal khawmte chuan ruihhlo ṭhat lohzia puanzarna thuziak hrang hrang kengin Areopagy aṭangin kawng an zawh nghal a ni.

"Ruihhlo kan ram hmelma" tih thupui hmanga high school level essay writing competition-ah H. Hmingmuanpuii (Class-X), Ngurnunsangi English School chu pakhatna niin, pahnihna R. Lalropari (Class-X), Don Bosco School leh pathumna Lalrambeiseisangi (Class-IX), Downtown English School te an ni a. "Say no to drugs, say yes to life" tih thupui hmanga high school level drawing & painting competition-ah C. Lalhlimpuia (Class-X), Ngurnunsangi English School chu pakhatna niin, Lalhruaizeli (Class-IX), Ngurnunsangi English School leh Reuben K. Lalhnehliana (Class-X), Don Bosco School te chu pahnihna an ni a, Lalhriatzuali (Class-X), Govt Southern Public High School leh Barnard Vanlalhlupuia (Class-X), Don Bosco School te chu pathumna an ni.