Kum tina hman thin International Women's Day chu Lawngtlaiah pawh vawiin khan Lawngtlai District Legal Services Authority (DLSA), Lai Women's Association (LWA) General Headquarters leh MHIP Sub-Headquarters Lawngtlai te tang kawp huaihawtin BNRGSK Hall-ah hman a ni.

He hun hi LWA General Secretary Pi F.Hranghlunchhungi'n kaihruaiin, Pi Irene Colbert-in hunserh a hmang a. Chief Judicial Magistrate Pu Laldinpuia Tlau chuan mipa leh hmeichhiate intluk tlanna thu sawiin, India dan leh Bible zirtirnaah chuan mipa leh hmeichhia hi intluk tlang reng kan ni a; kan nihna leh mawhphurhna a inang lo mai zawk a ni, a ti.

He hunah hian inneih, inthen, rokhawm leh chawmna pek chungchang leh India ram dana hmeichhiate dikna chanvo hrang hrang sawi ho a ni a. Lam leh zai te thlir leh ngaihthlak ho niin, Sub-Headquarters MHIP Vice President Pi K.Nithai'n lawm thu sawiin hun a khar a ni.