Vawiin khan Lawngtlai District Level Committee on Afforestation and Conservation (DLCAC) chu a tum khat nan Lawngtlai DC Conference Hall-ah an Chairman, Bawrhsap Dr A. Muthamma IAS hovin an thu khawm.

Bawrhsap chuan tun hma chuan Mizoram chu ramngaw chhah takin a khuh, nungcha chi tinreng awmna a ni thin a; tun hnaia ngaw kan thiah nasat avangin sik leh sa pawh a mumal thei ta lo tih sawiin, ngaw tha siam leh tura tan kan lak a tul tak zet a ni, a ti a. Ramngaw humhalh tur hmun thlang tur leh hma la tura district level committee din a ni ta chu lawmawm a tih thu sawiin, member kal khawmte chu ngun taka an ngaihtuahna seng turin a sawm nghal.

He thut khawm vawi khatna hmanpui tur hian Mizoram Environment & Forest Consultative Forum (MEFCOF) General Headquarters, Aizawl atangin hruaitu pathum - President Pu VL Bela, Vice President Rev. Dr Sangkhuma leh Financial Secretary Pu Lalhrima Sailo te an lo kal a. Anni hian Mizorama ramngaw leh a chhunga cheng nungchate humhalh tura kum 2004 atanga MEFCOF hma lak tawh dan te an sawi a. Ramngaw humhalh tih chuan thing va phun belh chiam emaw a tum a ni ber lo va, a awm sate venhima khawih chhiat loh chuan kum rei lo teah ngaw tha a lo awm mai a ni tih sawiin, sapel thin leh ram vak thinte chu ti tawh lo tura an rilru hminsak a pawimawh thu an sawi a. MEFCOF hma lakna pawimawh ber chu Zotheihuan din a ni a, chuta an policy chu "Khawih Chhiat Loh Policy" a nih thu sawiin, member-te pawh Mizoram sawrkar duhthusam ang ngeia khaw tina Zotheihuan din a nih theih nana hma la turin an sawm nghal a ni.

He hunah hian Zotheihuan din pawimawhna te, a din dan tur leh a kalphung te leh a enkawl zui zel dan tur te sawi ho a ni a. Lawngtlai District chhungah Mampui khua chauhvin Zotheihuan an la neih avangin hmun dangah pawh din belh thuai tura hma lak rel a ni.

Tun dinhmunah Mizoramah Zotheihuan za (100) chuang din a ni tawh a. He'ngah hian thing leh mau, thei leh pangpar chi hrang hrang awmin, nungcha chi hrang hrang pawh humhalh niin pun lam an pan zel a. Sik leh sa nuam zawk, boruak thianghlim leh tuihna siam nan he Zotheihuan hi a tangkai hle a. Mizoram sawrkar chuan kum 2015 April thla khan MEFCOF hi NLUP Implementing Agency-ah dahin, Zotheihuan pawh khaw tina din turin a tahtawla hma lak zel a ni.

Vawiin thut khawmah hian DLCAC member sawrkar official te, tlawmngai pawl hrang hrang ai awhte leh MEFCOF Sub-Headquarters Lawngtlaia hruaitute an tel.