Lawngtlai District Sanitation Task Force chu an Chairman, Bawrhsap Pu N. Chakhai MCS hovin vawiin khan DC Conference Hall-ah an thu khawm a. Mizoram Khawpui Fai Inelna 2018 atana inbuatsaih dan hrang hrang an thlir ho.

He hunah hian khawpui fai inelna atana mawh phurtu hrang hrangte hma lakna leh thut khawm hmasain hma lakna tur a ruahmante bawhzui a nih dan thlir ho a nia. Ran khuahkhirh chungchangah ui leh ar khuahkhirhna order chu District Magistrate hminga tihchhuah a nih tawh thu leh bawhzui chhoh zel a nih thu tar lan a ni a; mahni in leh a vel vawn fai thuah pawh kohhran leh VC hrang hrangah ngenna thlen a nih thu te, veng chhung hnatlang pawh thawh chhoh mek a nih thu te, tui luankawr tihfai kawngah pawh hma lak a nih thu leh fai inzirtirna pawh kalpui mek a nih thu te ngaihthlak a ni bawk.

Vawiin thut khawmah hian hma lak tawhna sa chu tha taka chhunzawm zel ni se, tih a nih bakah, hma lak belh a tulna lai te sawi belh a ni a. Khawpui fai ni reng thei tura kum tluana hma lak chhoh zel ni se, tih a ni.

He thut khawmah hian LADC-a EM i/c LAD Pu H. Chhuanawma bakah, member dang te, official te, VC leh tlawmngai pawl hrang hrang ai awhte an tel a. Thut khawm zawh hian UD&PA atanga bawlhhlawh bawm leh a hunna leh inzirtirna thuziak tar turte sem nghal a ni a. Bawlhhlawh bawm hi veng hrang hrang VC-te hnen bakah, office leh hmun pawimawh zual leh lirthei stand-ah te dah tur sem niin, a vaiin bawm 137 sem chhuah a ni.