Vawiin dar 11:00am hian Central YLA Hall ah Kut Hnathawktute Ni (NLUP din champha) 2016 hman a ni a, Minister Pu C. Ngunlianchunga chu khuallian a ni.

Pu C. Ngunlianchunga chuan, Mizoram kan vanneih bikna chu sawrkar in kut hnathawktute ngaipawimawh a, an hmasawnna atana New Land Use Policy a duang chhuak hi a ni, a dawngtute tan chuan hmasawn tura insiamremna hun remchang leh tha chungchuang a ni. Hei vang hian NLUP dawngtute chu dik taka hmanga, hmasawn pui tum ngei turin ka ngen a, NLUP dawngtute an hlawhtlin chuan Mizoram Economy hi a chawikang dawrh thei dawn a ni, a ti. Lawngtlai District vanneih zia sawiin Minister chuan hun reiloteah Lawngtlai District chu ram leh ram insumdawn tawnna hmunpui tur a ni dawn a, chu hun atana kan inbuatsaihna tha ber chu hralhchhuah tham tharchhuah neia lo awm hi a ni a ti bawk. Khuallian hian NLUP dawngtu mi 15 te hnenah NLUP tanpuina a sem nghal a ni.

Inkhawm kaihruaitu Lawngtlai Bawrhsap Pu J. Hmingthanmawia pawhin thu sawiin kut hnathawktute hmasawnna tura Lawngtlai District chhunga sawrkar hmalakna hrang hrangte a tarlang a, hmalakna lian ber NLUP kalpui dan leh NLUP a hlawhtlin theih nana hmalakna hrang hrangte a sawi bawk. Tin, he hunah hian District Level NLUP Implementing Committee bultuma “Lawngtlai District Chhunga NLUP Hmalak Dan Tlangpui” tih Booklet District Information & Public Relations Officer, NLUP District Media Officer ni bawkin a buatsaih chu a thlawna sem a ni.

Chawhnu lam Session ah Lawngtlai khawpui leh a chhehvel khuaa NLUP 3 & 4th Phase tanpuina dawng tura thlan te hnenah NLUP tanpuina sem zui a ni a, Industries Department atangin chhungkaw 229, Horticulture Department atangin chhungkaw 39 leh Agriculture Department atangin chhungkaw 60 te hnenah tanpuina hi sem a ni a, loneituten harsatna an tawh leh an mamawh hrang hrangte sawihona hun hman nghal a ni bawk.

Kut hnathawktute Ni hmanna inkhawmah hian Rev B. Zazawna, AGS LIKBK in hunserh a hmanga, Department hrang hranga Officer te, NLUP Line Department Staff te, Lawngtlai leh a chhehvel khuaa NLUP tanpuina dawngtute, Village Councils te, tlawmngaipawl hrang hrang leh kohhran hrang hrang aiawhte an tel a ni.