Mizoram hmun dang rualin vawiin khan Champhai ah pawh Kuthnathawktute Ni chu Town Hall-ah NIB Chairman Pu JH Rothuama, Champhai South bialtu MLA ni bawk hovin ropui taka hman a ni. He hun hi Champhai DC Pu Vanlalngaihsaka chuan kaihruaiin, Agriculture, Horticulture, Forest leh Fisheries Department hnuaia NLUP 2nd, 3rd leh 4th Phase beneficiary-te hnenah tanpuina sem a nih bakah Kuthnathawk hlawhltingte chawimawina hun hman a ni.

NIB Chairman chuan kuthnathawktute tellovin ramin hma a sawn theihloh thu a sawi a. Kum 6 pumhlum NLUP kalpui a nih hnu a hmasawnna hrang hrangte tarlangin, ran vulh ah te hmasawnna ramin a hmuh thu leh, bawnghnute sawngbawlna tha tak2 te neih a nih thu a tarlang a. Neih belh tura sanction siam zel a nih thu te a sawi a. Heng bakah hian lo neitute tan an thlai chin a puitlin hmaa eizawnna lailawk dap sak te, thing leh mau tipung tura thing rah leh tiak te kui a tih pun bakah tlawmngai pawlte nen inremna thuthlung ziah chungchang leh; lo vat a hnathawk zat zawi zawia an kiam zel te chu NLUP kalpui hnu a hmasawnna hmuh theih thenkhat a nih thu NIB Chairman hian a tarlang a.

MLA Pu JH Rothuama chuan kuthnathawktute tan hmasawnna tur kawng hrang hrang dapa Sorkain a thawh thu a sawi bawk a. Plantation (kuhva, serthlum, rubber) hlawk zawka chin a enkawl theih dan te; thlai tiak sem tur kan intodelh zel theih nan leh, quality tha zawk tihpun dan te; link road siam belh tura hmalak a nih zel thu te a tarlang a. UN Agency panga te leh Minnesota University mithiamte nena thawhhona pawh kawng hrang hranga Mizoramin a chhawr chhoh zel thu te leh, a bikin vawk pul hri tih bo leh Mizoram a intodelh theih nana ran chi tha zawk nei thei tura hmalakna te chu tha taka kalpui a nih thu a sawi a. NIB Chairman chuan kuthnathawktute taimakna in ram pawn mithiamte leh company-te a ko lut mek a ni tiin, an hlawhtlin theih nan duhsakna a hlan a ni.

DC Pu Vanlalngaihsaka chuan NLUP chu ram mipuite chawikang a, eizawnna siam sakna atan a ruahman a ni a. Chhungkaw hmasawnna chuan ram hmasawnna a hril zel dawn a, chuvang chuan a dawngtu ni ve lo pawhin NLUP avang hian hamthatna eng kawng emaw chuan kan hmu tlang zel dawn a ni, a ti a. Chutihrual chuan a dawngtute pawhin an dawnna chhan an hriat a pawimawh a tih thu leh, rinawmna nena thawk te chuan tunah pawh hlawhtlinna an hmuh zel thu a tarlang a ni.

Vawiin hian AMFU Champhai ten Champhaia kuthnathawk hlawhtling a thlanchhuah mi pathum hnenah chawimawina thilpek a siam chu Khuallian hian a hlan nghal a. Heng mi hlawhtling thlan te hi Pu F. Lalfakzuala, Champhai Vengthlang (grape chin), Pu Kapbuaia, New Champhai (buh chin) leh Pu K. Pachhunga, Kahrawt (sangha khawi) te an ni a. Kuthnathawktute aiawhin Pu H. Taithuama, President, AMFU Champhai hnen atangin thusawi ngaihthlak a ni bawk.

Vawiin hian NLUP Line Department pali atangin tanpuina sem a ni a. Agriculture Department chuan WRC-II ah beneficiary 427 hnenah 2nd phase final install installment Rs. 25,000 theuh a sem a.

Horticulture Department hnuaiah beneficiary 396 hnenah 3rd Phase 2nd installment leh 4th Phase 2nd instalment hnuaia beneficiary 185-te hnenah tanpuina Rs. 10,000 theuh sem a ni.

Forest Department hnuaiah 3rd phase hnuaia beneficiary 103 leh 4th phase hnuaia beneficiary 14 hnenah final installment tanpuina Rs. 65,024 pek a ni a. Fisheries Department hnuaiah hian 3rd Phase hnuaia beneficiary 98 leh 4th phase hnuaia beneficiary 45 hnenah final installment tanpuina Rs. 6000 theuh sem a ni bawk.