924/2023-2024

2023 Nikir thla ni 26: Lai Autonomous District Council (LADC) leh Chakma Autonomous District Council (CADC) hnuaia Village Council (VC) 11-a hmun ruak hnawh khah nana by-election neih tur atana electoral roll siam thar tur behchhana hman tur draft electoral roll chu vawiin khan Lawngtlai Sub-Divisional Officer (Sadar) Pu Daniel Sailo chuan Lawngtlai DC Conference Hall-ah a tlangzarh a. Draft electoral roll hi political party ai awhte hnenah a hlan nghal.

Pu Daniel Sailo chuan VC by-election buatsaih turah vote nei thei zawng zawngte'n vote an neih vek theih nan leh electoral roll-a chuang thei lote paih an nih theih nan special summary revision chu ruahman a ni tih sawiin, a buaipuitu official-te leh village level officer-te chu fimkhur taka roll revision kalpui turin a chah a. Electoral roll felfai leh rin tlak a awm theih nan leh inthlan thianghlim, felfai leh muanawm tak buatsaih a nih theih nan political party hrang hrangte thawhpuina a ngen nghal bawk.

He hun hi Election Officer Pu Denny Lalchhuanawma chuan kaihruaiin, VC by-election buatsaih tur atana special summary revision kalpui dan tur tlangpui a sawi fiah a. Political party ai awhte nen electoral roll dik leh felfai zawk a awm theihna tura hma lak dan tur rawtna hrang hrang sawi ho a ni bawk.

By-election hi LADC hnuaia VC 8-a general seat 10 leh reserved seat 2 hnawh khahna tur leh CADC hnuaia VC 3-a general seat 3 hnawh khahna tura ruahman a ni a. LADC huam chhungah 32-Nghalimlui, 47-Dumzautlang, 50-Kakichhuah, 59-Chamdurtlang-II, 67-Electric Veng Lawngtlai leh 68-Lawngtlai Bazar-ah te general seat 1 ṭheuh hnawh khah tur awmin, 65-Kawnkhua-ah general leh reserved seat 1 ve ve leh 87-Thaltlang-ah general seat 3 leh reserved seat 1 hnawh khah tur a awm a. CADC huam chhungah 20-Aratinagar, 30-Jarulsury-I leh 47-Vaseitlang-II-ah te general seat 1 ṭheuh hnawh khah tur a awm bawk.

Draft electoral roll-a a lan danin, LADC hnuaiah Nghalimluiah voter mipa 367 leh hmeichhia 354, a zavaiin voter 721; Dumzautlangah voter mipa 86 leh hmeichhia 65, an zavaiin voter 151; Kakichhuahah voter mipa 66 leh hmeichhia 80, an zavaiin voter 146; Chamdurtlang-II-ah voter mipa 44 leh hmeichhia 41, an zavaiin voter 85; Kawnkhuaah voter mipa 66 leh hmeichhia 60, an zavaiin voter 126; Electric Veng Lawngtlaiah voter mipa 522 leh hmeichhia 529, an zavaiin voter 1,051; Lawngtlai Bazar-ah voter mipa 794 leh hmeichhia 958, an zavaiin voter 1,752; Thaltlangah voter mipa 208 leh hmeichhia 204, an zavaiin voter 412 te an awm a. CADC hnuaiah Aratinagar-ah voter mipa 936 leh hmeichhia 994, an zavaiin voter 1,930; Jarulsury-I-ah voter mipa 318 leh hmeichhia 323, an zavaiin voter 641; Vaseitlang-II-ah voter mipa 136 leh hmeichhia 126, an zavaiin voter 262 te an awm bawk.

Vawiina tlangzarh tak draft electoral roll aṭanga paih ngai emaw, belh ngai emaw, siam ṭhat tur emaw neite tan 2023 June ni 27 aṭanga July ni 11 chhungin claim & objection hun hawn a ni a. 2023 July ni 1-a kum 18 tling chinte chu electoral roll-ah hian thun theih a ni a. Final electoral roll hi 2023 July ni 18-ah tlangzarh tura ruahman a ni.