No.6576/2020-2021

Lawngtlai, Sahmulphah thla ni 17, 2020: Kumin December ni 4-a Lai Autonomous District Council (LADC)-a Member of District Council (MDC) Inthlanpui lo awm tura LADC huam chhunga polling station 111-a Presiding Officer (PRO) leh 1st Polling Officer leh 2nd Polling Officer tura ruatte tan vawiin khan Govt Region Higher Secondary School, Lawngtlaiah training buatsaih tan a ni.

Vawiina training buatsaih hi Lawngtlai District Election Officer (DEO) Dr Andrew H. Vanlaldika chuan a hmunah tlawhin, training kalpui dan a enpui a. Trainee-te chu an mawhphurhna pawimawhzia hria a, inthlan felfai tak a awm theih nana theih tawp chhuah turin a chah.

Training-ah hian polling official-te tih tur leh mawhphurhna hrang hrang bakah, EVM hman dan leh enkawl dan (EVM hands-on training) te zir ho a ni a. Sawi hona leh zawhna leh chhanna hun hman a ni bawk.

Tun tum election atan hian polling official tur mi 478 ruahman an ni a. Vawiin atang khan training hi neih tan niin, COVID-19 hri leng avangin tum khatah koh khawm vek an ni lo va, a tahtawlin training hi neih chhohpui an ni dawn a ni.

Vawiina training tura koh polling official-te hi hmun thumah inthen darhin, District Level Master Trainer-te - Pu Hmingmawizuala, Pu Chinlianmanga, Pu Samuel Zodinsanga, Pu H. Vanlalbiakzauva, Pu Alex Lalzawmpuia leh Pu Jonathan Lalrinliana te'n training hi an pe a ni.

Vawiin vek khan LADC MDC inthlana sector officer turte pawh DC Conference Hall-ah koh khawm niin, DEO Dr Andrew H. Vanlaldika leh Election Officer Pu Lalneihthanga Colney te'n an hriat tur pawimawh hrang hrang an hrilhfiah a. EVM hman dan zir ho nghal a ni bawk.

LADC-a MDC Constituency 25 awm chu sector 19-ah siam niin, hemi vil tur hi sector officer pakhat theuh ruat an nih bakah, a tul huna koh theih tur reserved sector officer pali ruat an ni bawk.

LADC MDC Inthlanpuia duty turte hi training an neih hmain District Hospital Lawngtlaiah hripui laka an fihlim leh fihlim loh endik hmasak vek an ni a. Hri lakah an fihlim tih chianna lehkha neite chauh training ah hian an tel a ni.