Vawiin khan Mizoram Remote Sensing Application Centre (MIRSAC) bul tumin Lawngtlai DC Conference Hall-ah khawl hmanga leilung chhiatna laka khawpui him leh him loh zir chianna leh chumi zulzuia ruahmanna siam dan (digital 3D terrain modelling and mapping & hazard risk and vulnerability analysis) chungchang zir hona (workshop) buatsaih a ni a. Sawrkar department thenkhat bakah, Lawngtlai khawpui chhung veng hrang hrang VC leh YLA ai awhte an tel.

Lawngtlai Bawrhsap Pi Shashanka Ala, IAS chuan he hun hi hmanpuiin, MIRSAC-in chuti ang hun an buatsaih chu lawmawm a tih thu sawiin, Lawngtlai chu khuarel chhiatna thlen hlauhthawnawmna hmuna awm a nih avangin MIRSAC technology leh an thil hmuh chhuahte chu khawpui him nan a ?angkai hlea a rin thu leh workshop chu a telte'n an chhawr hle a rin thu a sawi a. Chhiatna thleng mai thei lo hriat lawk a, fimkhur taka a hmachhawn dan lo zir chu a pawimawh hle a ni, a ti.

He hun hi Lawngtlai Sub-Deputy Commissioner Pu Lalsanglura MCS-in a kaihruai a. MIRSAC, Aizawl atangin Scientist pahnih - Pu R. Lalfamkima leh Pu Lalramdina te'n satellite thlalak hmanga ram leilung ruangam lem din dan (3D terrain mapping) leh Lawngtlai khawpui innghah chhan leilung an zir chian dan (hazard risk vulnerability analysis) te an sawi a. Lawngtlai khawpuia lirnghing thlen hlauhawm zualna lai leh chhiatna lian tham a thlen loh nana chet lak dan tur an ruahman te ngaihthlak niin, zawhna leh chhanna hun hman chhunzawm a ni.

Vawiin hun hmanah hian chhiatna thleng thei laka innven dan bakah, kan hmaa Lok Sabha Inthlanpui 2019 lo awm tur atana thil pawimawhte inhrilhfiahna hun hman a ni bawk.