Vawiin khan Member of Parliament (Lok Sabha) Inthlanpui 2019 lo awm tura Lawngtlai District chhunga polling station 165-a 1st & 2nd Polling Officer (PO) tura ruatte tan Lawngtlaia Don Bosco School-ah a tum hnih nan training buatsaih leh a ni.

Vawiina training buatsaih hi Lawngtlai District Election Officer (DEO) Pi Shashanka Ala, IAS chuan a hmunah a tlawh a, trainee-te chu an mawhphurhna hre chiang a, inthlan felfai tak a awm theih nana theih tawp chhuah turin a chah.

Training-ah hian 1st & 2nd polling official-te tih tur leh mawhphurhna hrang hrang bakah, EVM hman dan leh enkawl dan (EVM hands-on training) te zir ho a ni a. Sawi hona leh zawhna leh chhanna hun hman a ni bawk. Trainee-te hi hmun rukah inthen darhin, District Level Master Trainer-te - Pi Carolyn LB Khiangte MCS, Pu Lalneihthanga Colney MCS, Pu Lalsanglura MCS, Pu Alex Lalzawmpuia (LADC), Pu Collins Ngurnunchunga (LADC) leh Pu Jonathan Lalrinliana (KVK) te'n training hi an pe a ni.