Vawiin khan Lok Sabha Inthlanpui 2019 atana Lawngtlai District chhunga Flying Squad Team (FST) leh Static Surveillance Team (SST)-te chu Lawngtlai DC Conference Hall-ah koh khawm niin, thil pawimawh hrang hrang sawipui leh hrilhfiah an ni.

Lawngtlai Election Officer Pu Lalremruata Sailo MCS leh Sub-Deputy Commissioner Pu Vabeimozachhi Chozah MCS te'n SST leh FST-te hi model code of conduct (MCC) hman tan a nih tak avanga an hna an tan ve nghal a ngaih thu hrilhin, an hna thawh dan tur an sawipui a. District chhunga an chet velna tur te, thil pawimawh chhinchhiah fel dan tur leh report pek dan tur chungchang te sawi ho a ni bawk.

FST leh SST-te hian MCC bawhchhia an awm loh nan a vil hna an thawk dawn a, MCC bawhchhiatna a thlen chuan dan angin hma an la zel dawn a ni.