Lawngtlai District huam chhunga Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a June ni 6, 2019-a by-election neih tura inthlanna buaipuitu tur Polling Officer leh Asst Polling Officer-te pualin vawiin khan Lawngtlai DC Conference Hall-ah training thawh khatna buatsaih a ni.

He'ng bial pahniha Returning Officer Dr Andrew H. Vanlaldika MCS chuan inthlan felfai tak neih a nih theih nan inthlanna buaipuitu turte chu theih tawp chhuah tur leh hriat thiam loh leh harsatna an neihte chu Election thuneitute hnena thlen zung zung turin a chah a. Hemi hnu hian polling official-te chu an duty-na tur hmun (polling station) thliar fel nghal niin, polling station pali (4) awmna Lungtian MDC bialah reserve nen polling party panga (5) an awm dawn a; polling station pahnih (2) awmna Ugudasury South MDC bialah reserve nen polling party pathum (3) an awm dawn bawk.

He'ng bial pahniha by-election neih turah hian Electronic Voting Machine (EVM) hman a ni dawn a. Vawiin hian EVM hman dan inzirtirna pawh neih nghal niin, vote thlak laia harsatna a thlen palh pawha vote thlak a khaihlak loh nan EVM reserve pawh fel takin ruahman a ni bawk.