Vawiin kha MZP Headquarters Champhai bultumin HSLC leh HSSLC pass thate lawmpuina hun Govt Champhai College Multipurpose Hall-ah neih a ni a  Law and Judicial etc changtu Pu TJ Lalnuntluanga, Minister of State chuan khuallian niin a hmanpui a, Dr. ZR Thiamsanga MLA Champhai North  chuan khualzahawm niin a hmanpui bawk.

Khuallian Pu TJ Lalnuntluanga  chuan   Zirlaite lawmpuia an kal leh zelna  thlirpuia hun buatsaihtu  MZP te chu fakawm a tih thu a sawi a. Zirlai kalkhawmte chu an result-a lungawi mai lo tura chahin hlawhtlinna kawt chhuaha  ding ve chauh an ni tih hria a, inthlahdah lova zir chhunzawm turin a chahin  an result chu tumruh leh zualna pe tu nise a duh thu a sawi bawk.

Pu TJ Lalnuntluanga chuan taimakna leh tumruhna pawimawhzia sawiin 'Taimakna leh tumruhna an neih loh avangin zirlai thiam thei tak tak te uiawm tak takin an lo thamral tawh a ni' a ti a. 'Lehkhathiam thei te chauh hi mihlawhtling an ni vek bik lo va, mi taima leh tumruh mi te aia bei nasa te hian hlawhtlinna tlang an lawn chhuak zawk thin a ni" a ti bawk.

Lawm Minister chuan Zirlaite chu thiamna tak tak nei tura lehkha zir tura chahin 'Mizote hian sawrkar hna chauh hi hna taka kan la ngaih avangin hna hi a vang reng dawn a, a thiam leh chhawr tlak tak takte tan erawh chuan hna hi a awm reng a ni tiin,  eng kawng pawh zawh dawn ila tih tak takna nena chhawr tlaka thiam turin kan beih a ngai a ni" a ti bawk.

Minister chuan   ram leh hnam, kan chhungkua a dam theihna tur leh a zahawm theihna turin Pathian hre chungin lehkha kan zir a ngai a ni, a ti a,   hnam zia rang theihnghilh tawk leka lehkha zir lova an thiamna leh finna te ram leh hnam tana hmang turin zirlai kalkhawmte chu a chah bawk.

Khualzahawm Dr. ZR Thiamsanga pawhin thusawiin zirlai pawlte hmalakna avangin hmasawnna tam tak a thlen tawh thu sawiin zirlaite'n an tawrh kher ngai tawh lovin Champhaiah
Surgeon, ENT, Blood Bank Officer tur MD, Hnimhlum Doctor dah a nih tur thu te, TRAUMA Centre, ICU, dialysis te buatsaih mek a nih thu a sawi a. Dr. ZR Thiamsanga chuan zirlaite chu an zirlaia theihtawp chhuaha ram leh hnam tana chhawrnaawm tak ni thei tura fuihin, Champhai hmel lanna tur tak tak an nih avangin an zirlai tibuai thei thil chi hrang hrang laka inthiarfihlim ngam turin a chah bawk a ni.

He hunah hian HSLC Distinction-a pass te, HSSLC First  Division-a pass te bakah 100% pass zirna in te hnenah lawmpuina pek an ni a. Lalthasangzuali National Bravery Awardee hnenah chawimawinna thilpek hlan a ni bawk.

He hun hi Pu Lalrammawia Tlau, Vice President MZP Champhai Hqrs chuan kaihruaiin,  MZP Hqrs President Pu H Lalramhluna leh MZP General Hqrs President  Pu L Ramdinliana Rethlei te hnen atangin thusawi ngaithlak a ni a. Pu  Lalthanfela Secy MZP Hqrs Champhai hnen atangin report ngaihthlak niin Pu Thangdeihmanga, Treasurer MZP Hqrs Champhai chuan lawmthu sawiin he hun hi a khar a ni.

Attachment

  • Loading attachment...