1402/2023-2024
2023 Thlazing ni 7: Vawiin khan Lawngtlai District Rural Development Office (DRDO) Project Director Pi Marilyn Rualzakhumthangi hovin a office chamber-ah India ram zalenna kum 75-na lawmna, "Azadi ka Amrit Mahotsav" (AKAM) kalpui mek hmawr bawkna tura ruahman, "Meri Maati Mera Desh" (My Mother My Country) campaign Lawngtlai District chhunga kalpui dan tur sawi ho a ni.
He hunah hian Lawngtlai Superintendent of Police Pu Lokeshwaran R. bakah, line department hrang hrang ai awhte an tel a. Chairman Pi Marilyn Rualzakhumthangi chuan Azadi Ka Amrit Mahotsav (AKAM) hnuaia India ram zalenna kum 75-na lawmna kalpui chhoh dan tar langin, hemi puala khaw hrang hranga dil/tuikhuah (amrit sarovar) 75 siam turah target khuma tuikhuah 83 an siam thu a sawi a. AKAM kal zela Meri Maati Mera Desh hma lakna kalpui dan tur ruahmanna awm sate sawi fiahin, line department-te chu mahni zawna mawhphurhna awmte ṭha taka hlen chhuah tum ṭheuh turin a chah a ni.
He campaign hi India ramin zalenna a hmuh aṭanga kum 75-na lawmna atana kum 2021 March ni 12 aṭanga Azadi Ka Amrit Mahotsav (AKAM) hma lakna kalpui chhoh mek hmawr bawkna tura ruahman a ni a. He campaign-ah hian sawrkar laipui aṭangin Village Level, Block Level, District Level, State Level leh National Level thlenga tih tur tuk sa awmin, vawiin ṭhut khawmah hian Lawngtlai District chhunga district, block leh village level-a hma lakna kalpui dan tur sawi ho a ni a. He'ng hma laknaa mawhphur tur bikte pawh inruat nghal a ni.
Lawngtlai District chhunga Mera Maati Mera Desh campaign kalpui tur hi a bul ṭanna leh hawnna chu District Hmunpuiah August ni 9-ah buatsaih a ni ang a. August ni 9 leh August ni 15 inkar chhungin he'ng village level programme hrang hrang chi 5 te hi kalpui a ni ang:
(1) Hriat rengna lung phun (shilaphalakam/memorial plaque): India ram zalenna sualtute leh an duty laia thi ta central leh state sawrkar hnuaia sipai chi hrang hrangte hriat rengna lung phun. Amrit sarovar emaw, VC House emaw, sikul emaw, hmun remchang langsar laiah emaw phun tur a ni.
(2) Paanch Pran Pledge: Khaw mipuite'n ram tana thu tiam siam sa an tiam rual ang a. Hun hman lai emaw, hun hman zawhah emaw an kuta vut/lei kenga selfie thla lain, meri maati mera desh website-ah an dah lut ang.
(3) Vasudha Vandhan: Khaw tinah tualṭo thing ṭiak 75 ṭheuh phun tur a ni.
(4) Veeron Ka Vandhan: India ram zalenna sualtute leh an duty laia thi ta central leh state sawrkar hnuaia sipai chi hrang hrangte leh an chhungte chawimawina hun huaihawt a ni ang.
(5) Programme hmanna reng rengah hian Ram Puanzar (National Flag) pawh pharh leh Ram Hla (National Anthem) sak zel tur a ni.
August ni 16 leh August ni 20 inkar chhungin Block Level programme kalpui tur a ni a. RD Block huam chhhunga khaw tin aṭangin lei (soil) la khawmin, block hmunpuiah thlenpui a ni ang a. He'ng lei lak khawmte hi hlumbel (mitti-kalash/earthen pot)-ah dah khawmin, he'ng khaw tin aṭanga lei lak khawm hi National Capital, New Delhi-ah August ni 27 leh August ni 30 inkar chhungin Kartavya Path-a Amrit Vatika huan siam nan hman a ni ang. He huanah hian tualṭo thing chi hrang hrang ṭiak leh AKAM hriat rengna lung te phun a ni ang.
He'ng bakah hian Meri Maati Mera Desh hma lakna pual hian Lawngtlai District Rural Development Office chuan tih tur hrang hrang a duang bawk a. Lawngtlai District chhunga amrit sarovar awmna khaw tinah "Tiranga Yatra", India Ram Puanzar kenga kawng zawh buatsaih a nih dawn bakah, mipuite'n faina kawnga hma sawn turin thutiam (cleanliness pledge) an tiam ang a. Block tina amrit sarovar thlan bik hmun 5 ṭheuhvah naupangte pualin inelna hrang hrang - painting, slogan writing, rangoli, speech, adt. bakah, hmanlai infiamna chi hrang hrang - inkawibah, invawr, inhnawk, adt. hmangin intihsiakna buatsaih tur niin, he'ngah hian DRDO aṭangin lawmman buatsaih a ni bawk ang.
