Vawiin khan Lawngtlaia LADC Conference Hall-ah Mizoram sawrkar ruahmanna, New Economic Development Policy (NEDP) peng pawimawh tak Entreprenuership Development Scheme (EDS) hnuaia hma lakna inzirtirna leh Mizoram Kailawn 2018 kalpui mek chungchang inhrilhfiahna hun (outreach programme) hman a ni. 

He hun hi Lawngtlai Sub-DC Pu Vabeimozachhi Chozah MCS chuan kaihruaiin, kal khawmte lawmna thu a sawi a. Mahnia sumdawnna bul tan ngam khawpa huaisente chu hlawhtlinnain a lo hmuak reng thin a ni, a ti. 

He hunah hian MEDMOC Master Trainer Dr Lalchhuanmawia chuan Mizoram sawrkarin NEDP hnuaia EDS a duan chhuah dan leh hma lakna tur hma chhawp hrang hrangte sawi fiahin, Mizoram hmasawnna tur kailawn pawimawh tak a nih thu a sawi a. Sumdawnna kawnga hlawhtling leh dingchang tura thil pawimawh hrang hrang te, EDS hnuaia a ngaihna hriate tana hamthatna hrang hrang awm thei tur te a sawi fiah bawk. 

Indian Institute of Management Calcutta Innovation Park (IIMCIP) Partner Pi Zorammawii Ralte chuan EDS hnuaia Mizoram Kailawn 2018 kalpui mek chungchang leh tel ve tura tih dan tur te a sawi fiah a. Mizoram Kailawn chu Mizoramin hmasawnna kawng thar a zawh theihna tura ruahman, eizawnna tur thil thar chin chhuah tur hria leh kawng sial duh mite tana suangtuahna puitlin theihna tur hun remchang, bawhpelh phal chi loh a ni, a ti.

Mizoram Kailawn 2017-a finalist Pi Rokimi Khawlhring chuan Mizoram Kailawna a tawnhriat leh amaha hlawkna a thlente a sawi a. Bootcamp leh a hnu zela mi thiamte kaihhruaina hnuaia an thil zir tam tak chu hlawhtling tura puitu a nih thu sawiin, Mizoram Kailawn chu mahni kea ding tura eizawnna kawng thar zawh duh mite tan malsawmna nia a hriat thu a sawi. 

Mizoram Kailawn 2018 hi a tum hnihna niin, sumdawnna kawng thar ruahmanna tha neite inelna tur a ni a. Hetah hian hma lakna hlawk leh awmze nei tura ngaihte ruahmanna theh lutin, chu chu mi thiamte’n a tha tha thlang chhuakin, sawrkar chuan an bul tanna tur lawmman a siamsak dawn a ni. Hemia tel duh leh ruahmanna theh lut ve duh tan www.mizoramkailawn.org-ah internet kal tlanga inziah luh theih a ni a. Ruahmanna hi May ni 10, 2018 thleng theh luh theih niin, mi thiamte’n an thlit fim hnuah May ni 31-ah result puan a ni ang a. A tlingte hrual zuina bootcamp hi June ni 13-16 hian buatsaih a ni ang a. June ni 20-ah Entrepreneurship Summit  neih tur niin, hetah hian lawmman pawh sem nghal a ni ang. 

Vawiina outreach programme-ah hian Lawngtlaia mahni remhriatna hmanga sumdawnna kalpui tawh leh bul tan chho mekte kal khawmin, thu sawi ngaihthlak bakah hian sawi hona leh zawhna leh chhanna hun hman a ni bawk.