2159/2023-2024

Lawngtlai dated 4th September 2023: Mizoram Legislative Assembly Inthlanpui 2023 lo awm tura candidate-te campaign senso chhutna atana Lawngtlai District chhunga hman tur thil man bitukna (rate chart) chu vawiin khan DC Conference Hall, Lawngtlaiah Pu Abraham Beirazi Khithie, Deputy District Election Officer kaihhruaina hnuai ah neih a ni.

Vawiin a Lawngtlai District-a MLA inthlanpui lo awm tur atan a Rate Card siam ah hian Hall, thutthleng, Sound System leh eitur chi hrang hrang man bithliah a ni a. Lirthei hman man, Flag leh Banner siam man bak ah Cable TV leh chanchinbu a pek chhuah chi fakna tihchhuah man te bithliah a ni bawk.

He hunah hian election official-te, ERO, AERO, DIPRO, Treasury Officer, Assistant Expenditure Observer-te bakah, political party hrang hrang aiawhte an tel a. Inthlan campaign nana bungrua leh thil dang mamawh hrang hrang awm thei turte ngaihtuahin, a man tur awm ang an bithliah nghal a ni a. Hemi zulzui hian candidate-te campaign senso chhut a ni ang.

Election Commission of India (ECI)-in inthlan campaign sensoa candidate-te sum hman theih zat a bituk angin, kumin Mizoram MLA Inthlanpui 2023-a candidate pakhatin campaign sensoa sum a hman theih tur zat chu cheng nuai 28 (₹ 28 lakh) a ni.