Vawiin khan Lawngtlai District pumpuia sentut hri danna pek beihpui thlak (meaasles-rubella vaccination campaign) kalpui tur chu Don Bosco School, Lawngtlaiah Addl DC Pi Ethel Rothangpuii MCS chuan a hawng.
Pi Ethel Rothangpuii chuan tun hma chuan hri danna la turin sum tam tak sen a ngai thin a, tuna sawrkar hma laknaa India rama naupang vaibelchhe chuangin a thlawna MR vaccine an dawng thei tur chu thil lawmawm tak a ni tiin, a hlawhtlin ngei nan a thawktute leh mipuite’n mawhphurhna sang tak kan nei a ni, a ti a. Hri danna lak chu ram mipui hrisel nan a pawimawh avangin a la rual tawh phawt chuan la vek se a duh thu sawiin, hri danna petu leh buaipuitute paw’n dawhthei tak leh thahnem ngai taka an hna thawk turin a chah a ni.
He hun hi District Immunization Officer Dr S. Thaizi chuan a kaihruai a. Lawngtlai Chief Medical Officer Dr Lalthlamuana chuan kal khawmte lawmna thu sawiin, MRVC chu thla khat chhung Lawngtlai District-a kalpui a nih dawn thu leh an target thla 9 leh kum 15 inkar naupang 42532 MR vaccine pek chu zaa za tihlawhtling tura hma lak tum a nih thu a sawi.
MRVC hawnnaah hian Lawngtlaia doctor awmho fa Don Bosco School-a kalte chuan hri danna hi an la hmasa hlawm a. Hemi hnu hian sikul naupang dangte chu hri danna hi pek chhunzawm nghal an ni. Vawiin hian Lawngtlai khawpui chhunga zirna in dang – Downtown English School, Jehova Jire School leh Adventist English School-ah te pawh hri danna hi pek niin, school-a hri danna pek hian chawlhkar 2 chhung a awh dawn a ni.
